DILI (timorpost.com)—Klubu Bragança City Sai kampeaun iha jogu futsal femininu, ne’ebé mak organiza husi Timor oan sira iha Portugal.
Matilde hanesan kapitaun ba ekipa Bragança City, hatete, sente orgullu tebes tanba ho esforsu ne’ebé mak sira iha ohin loron sira sai hanesan kampiaun ba iha eventu refere.
“Hanesan manan na’in ba iha futsal refere, mezmu ke ida ne’e hanesan eventu ki’ik maibé ami sai hanesan kampiaun ami sente kontente, tanba ho esforsu hotu ne’ebé mak ami iha ami bele sai hanesan manan na’in, “Nia haktuir ba Jornalista Timor Post, liu husi via telefónika, iha Kinta (11/04/2024).
Kona ba preparasaun ba iha eventu refere, mak aproveita iha tempu ne’ebé mak livre ou fim de semana de’it, tanba iha ne’ebá sira hotu barak mak preokupa ho ida-idak nia estudu, iha Sidade Bragança.
“Ami ida-idak hala’o ami nia estadu, kona ba treinu hamutuk so iha tempu fim de semana tanba ida-idak preokupa ho nia estudu”.
Nia dehan, nu’udar kapitaun ba iha klubu Braganca City, nia sei iha planu ba iha ekipa nafatin atu motiva di’ak liu tan, no enkoraja ba sira hotu atu dezenvolve abilidade ho kapasidade no skill ne’ebé mak iha.
“Ha’u nafatin motiva no enkoraja ekipa, atu nafatin treinu iha tempu livre hodi dezenvolve abilidade ho kapasidade no skill ne’ebé mak Ami iha em termus de futeból, atu nune’e ba futuru karik iha torneiu ne’ebé mak sei loke tan tantu torneiu ne’ebé mak loke husi Timor oan sira iha Portugal ou torneiu fora husi ida ne’e mós, ha’u hakarak atu hetan nafatin oportunidade, no buka nafatin hodi lori ha’u nia ekipa ba partisipa iha torneiu hirak ne’ebé mak sei mosu iha futuru,” Nia relata.
Mensajen ba kolega feto maluk hotu katak, nafatin dezenvolve imi talentu ne’ebé iha talentu atu joga futeból ou futsal, keta ta’uk atu espresa no hatudu talentu ho abilidade ne’ebé iha, tanba ohin loron iha igualdade jéneru, la’ós de’it ona mane bele hola parte iha mundu futeból, maibé ita feto mós bele.
5,013 total views, 3 views today
Bele hare Video Seluk :
Subscribe to Timorpost
