Dili(timorpost.com)— Hafoin manan ekipa Emmanuel Fc iha semana kotuk, Ekipa AD SLB Laulara kontinua riba klube reprezentante Universidade Nasionál Timor-Lorosa’e (Akadémika Fc) ho score 2-0.
Iha inisia jogu primeira parte ekipa rua tun kedas ho sira nia ambisaun aas hodi lansa kontra atake ba malu liuhosi tékniku no tátiku ida-idak nian, atu nune’e bele hatama golu ba malu bele manan iha jogu loraik ida ne’e.
Enkuantu ekipa Akadémika Fc tun ba pozisaun 4 ho Pontus 4 hosi jogu da-tolu manan ida derrota ida no empate ida. Jogu entre AD. S.L.B. kontra Akadémika Fc ne’e hala’o iha Estádiu Munisipál Dili, Tersa, (14/03).
Maibé ekipa SLB Laulara hatudu sira nia jogu ho ritmu ne’ebé makaas liuhosi sira nia jogu tiki-taka, hodi domina liu bola kompara ho ekipa Akadémika Fc ninian, ne’ebé mak difisil atu hetan bola ka hadau bola hosi nia adversáriu sira.
Nune’e, ekipa SLB Laulara ne’ebé mak domina bola ne’e lakohi husik oportunidade osan mean ne’ebé mak sira hetan, iha ne’ebá avansadu estranjeiru, Michel Hutabarat, fura kedas rede nia adversáriu Akadémika Fc ninian, hodi lori SLB lidera provizóriu ho score 1-0
Enkuantu jogadór nasionalidade Amérika Latina Chile ne’e hatama golu ba rede ekipa Akadémika Fc iha minutu neen, hafoin aproveita bola barullu iha grander ekipa Akadémika ninia.
Ho golu ne’e ekipa rua hasae liután tensi jogu, tantu hosi ekipa Akadémika Fc ne’ebé mak sofre uluk golu ida konsege domina hikas bola hodi lansa presaun liu hosi bola ain ba ain maibé atake ne’ebé mak lansa hosi Akadémika Fc seidauk bele rezulta golu ho nune’e to’o termina jogu primeira parte score mantein 1-0.
Kontinua ba jogu segunda parte ekipa kontinua hatudu ritmu jogu ne’ebé mak aas hodi lansa kontra atake ba malu, maibé sorte di’ak monu liu ba ekipa AD. SLB Laulara, hodi prodúz tan golu ida hodi hasae score ba 2-0 liuhosi jogadór Kornelis Portela.
Eis jogadór ekipa Malaga España ne’e, marka golu hafoin simu asisténsia bola pasajen hosi nia kompatriota iha liña eskerda Mouzinho Barreto de Lima nune’e avansadu na’in-rua halo kolaborasaun ho di’ak tebes ba sira nia ekipa.
Ho golu ne’e tensi jogu komesa manas liu tan no tama ba iha minutu 88 Akadémika Fc tenke joga de’it ho jogadór na’in-Sanulu hafoin kapitaun ekipa Akadémika Fc, Joel Gaiu hetan kartaun mean.
Maski nune’e la iha tan golu ruma mak akontese to’o termina jogu segunda parte vitória ba AD SLB ho score 2-0, Hosi rezultadu vitória ne’e hatuur ekipa AD. S.L.B. okupa iha primeiru tabela klasifikasaun primeira divizaun Liga Timorense ho Pontus 7 hanesan ho Assalam fc ne’ebé mak ho Pontus 7.
1,537 total views, 3 views today
Bele hare Video Seluk :
Subscribe to Timorpost
