Dili (timorpost.com)—Federasaun Desportu Eletróniku Timor-Leste (FDETL) iha mehi atu bele envolve iha Desportu Eletróniku Internasionál.
“Ami nia FDETL harii tanba mehi ida atu hatudu sira nia abilidade iha Desportu Eletróniku ba internasionál no lori Timor-Leste nia naran”, dehan Sekretáriu Jeral FDETL, Josue Turquel, ba jornalista sira, iha All Along Internet Café, Kolmera, Kuarta (03/05/2023).
Nia dehan FDETL nia objetivu rasik atu fó palku ida ba gamers nasionál, hodi bele kompete no hatudu sira nia abilidade nune’e iha nia rohan bele reprezenta Timor Leste iha Jogu Sudeste Aziátiku ou Sea Games no prepara gamer sira iha kompetisaun internasionál tuir mai.
FDETL rasik sei lori atleta jogadór online ba kompete iha Sea Games, iha loron 05 fulan Maiu 2023, atleta ne’ebé ba kompete hamutuk 17, ne’ebé sei joga iha game,Player Unknown’s battlegrounds (PUBG) iha gamer na’in-10 ne’ebé sei joga no Mobile Legends Bang Bang (MLBB) iha gamer na’in-hitu ne’ebé sei joga.
Alende ne’e mós iha fatin hanesan Prezidente FDETL, Camacho Ramos, dehan FDETL sai hanesan mahon ida ba juventude sira ne’ebé gosta halimar game (jogu online) atu hatudu katak hosi game mós bele lori Timor-Leste nia naran ba iha mundu internasionál.
“FDETL sei esforsu ba Sea Games ne’ebé sira sei tuir, atu nasaun seluk mós bele konsidera katak TL rasik mós iha abilidade, maski iha teknolojia ne’ebé mínimu, maibé esforsu nafatin”, nia hakotu.
5,506 total views, 6 views today
Bele hare Video Seluk :