Fiar Iha Jesus Mori Hias, Tenki Hakoak Paz No Hakmatek “Paz no Espírito Santo hela ho imi”

(Reflexaun badak ba domingo II tempo Paskoa. Act. 2, 42-47; Sal. 117; 1Pt. 1, 3-9; Jo. 20, 19-31)

Husi Luis Pereira, SJ
ADVERTISEMENT

SCROLL FILA BA NOTISIA

Kontexto!

Paz mak kondizaun ida ne’ebé ema hot-hotu buka. Basá, nia posibilita atu moris/vida suli ho diak. Ida ne’e mak ita Timor oan sira mehi. Se laiha paz, ema moris iha rungu-ranga nia laran; ema moris iha tauk nia laran; iha desordem nia laran; dezenvolvimento mós la bele lao; moris hakmatek no seguransa sai kestaun bót.

Ohin, ita hakat tama ona ba domingo daruak tempo paskua nian. Hahu husi domingo Resureirasaun, ita rona bei-beik/fila fila relato sira konaba aparisaun Jesus nian ba feto sira no discipulo sira. Hahu kedas husi Nia mosu ba feto sira ne’ebé dadersan nakukun ba ona rate; mosu ba Maria Madalena; mosu ba discipulo sira iha dalan ba Emaus; mosu ba discipulo sira iha Tasi ibun no ohin ita rona husi Evanjelho Joaun katak Nia mosu ba discípulo sira iha uma laran ne’ebé sira taka metin hela iha loron domingo (loron uluk semana nian).

Nia mosu ba sira atu hatudu katak Nia Moris Hias duni ona no discipulo sira preciza lori notisia ksolok ne’e, ba mundo tomak. Nia mosu atu konsola sira husi sira nia tauk ba judeu sira; fo korazem ba sira atu brani lao sai ba haklaken. Halós sira nia duvidas konaba Nia hanorin no nia mensagem sira. Haforsa sira ho Espírito-Santo atu sira iha kbít, hodi sai sasin Kristo Moris Hias nian ba ema seluk.

Ponto 3 ita bele reflete hamutuk:

Paz hela ho Imi!

Discipulo sira iha situasaun tauk nia laran. Sira chave-an iha uma laran. Derepente deít, Jesus Moris Hias mosu ba sira hodi dehan paz hela ho imi no hatudu ba sira, li-liu ba Tomé ne’ebé seidauk fiar, Ninia kanek iha liman no sorin. Sinal katak Nia, ida ne’ebé ema hedi iha Kruz, mak ne’e duni. Nia laós mate klamar/kuntilana/celestina nst. Tansá Jesus mosu ba discipulo sira ne’ebé tauk hela? Tamba, Nia hadomi nia kompanheiro sira ne’e. Nia kumpriende sira nia frakeza. Nia kumpriende sira nia hanoin no sira nia duvida. Nia kumpriende sira nia tauk.

Iha nia kompaixaun, Nia tama iha uma ne’ebé chave metin; Nia tama iha sira nia izola-an no tauk; hodi dehan ba sira ‘paz hela ho imi’. Ida ne’e mak sira preciza. Ida ne’e mak sira hein. Ida ne’e mak sira nia forsa. Jesus nia preokupasaun, ninia kompaixaun no domin ba sira, loke hikas sira fuan no odamtan ne’ebé sira chave-metin.

Ita nia moris hanesan kristaun iha tempo moderno agora, dala ruma hanesan discipulo sira nia situasaun. Ita mak “chave-an” iha uma laran (fuan no hanoin): tauk nian; iha buka provas fiar nian; iha ita nia preokupaun sira ho futuro igreja nian; iha ita nia preokupasaun sira ho futuro nasaun nian; iha ita nia prepokupasaun sira ho futuro família nian; nst.

Preokupasaun sira ne’e, halo ita chave metin-an iha uma laran, halo nakukun janela sira hodi la konsegue haré ba liur. Ita preciza Jesus Moris Hias no ninia dame atu bele loke odamtan ne’e, haroman janela sira, atu ita bele haré kmanek sira iha liur hodi bele sai sasin hanesan haktuir iha leitura dahuluk husi livro Apostolo sira nia hahalok.

Espírito-Santo!

Jesus, liu tiha dehan paz hela ho imi, no hatudu nia liman no sorin kanek ba discípulo sira, Nia huu iss ba sira hodi dehan “simu Espírito Santo ba! Sira ne’ebé imi perdua sira salan, sira hetan ona perdua ba sira salan; sira ne’ebé imi la perdua sira salan, sira lahetan perdua ba sira salan”. Apostolo sira, simu ES núdar sinal sai ema foun ne’ebé bele hamrík fali no sai husi sira nia tauk; sai ema brani ne’ebé bele hasoru susar-terus sira; sai ema ne’ebé bele fo sasin konaba sira nia fiar to’o ponto as liu, fo sira nia-an ba mate atu defende fiar refere.

Nuné, Simu ES katak simu Espírito domin, simu Espírito entusiasmo/zelo atu Naí Maromak mak okupa sira nia moris no simu Espírito atu perdua salan sira. Ho Espíritu-Santo nia prezensa iha Apostolo sira no ita, sira no ita bele halo buat barak ne’ebé ordinária sai extre-ordinaria li-liu halo buat sira ne’ebé komunidade kristan sira halo hanesan haktuir iha leitura dahuluk: karidade, ba uma kreda lor-loron, partilha domin no ksolok ba malu nst,.

Fiar!

Fiar mak chave ba ita atu bele hare Jesus Kristo Moris Hias. Fiar posibilita ita atu experiensia saída mak Tomé no Apostolo sira Experiensia. Fiar mak tulun ita atu simu Espírito Santo no husi nia loke ita fuan, neon no laran atu Naí Maromak nia Lia- Foun Diak bele moris no transmete ba ema seluk. Fiar mak bele halo milagre akontese. Ho fiar no tamba fiar, ita bele hakoak paz no hakmatek. Basá, ita enkarna ita nia an ho valor sira Jesus-Kristo Moris Hias nian.

Nuné, ita preciza husu grasa atu Naí Maromak hametin no habót ita nia fiar. So nuné deit mak ita bele hananu ho Salmista “Haklaken Maromak, tan Nia diak, Nia hadomi nafatin”. Amen! (lupersj)

(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)