“Ita hakarak karik, ita bele go isin diak mai Hau”
Reflexaun badak ba domingo VI tempo komun nian. Lev. 13, 1-2. 44-46; Sal. 31; 1Cor. 10, 31-11,1; Mc. 1, 40-45)
Hosi: Luis Pereira SJ
Kontexto!
Ita tama ona ba domingo VI tempo komun nian. Liturjia kontinua lori ita lao tuir Jesus nia misaun haklaken Lia-Foun Diak Salvasaun nian ho lia-fuan no hahalok. Nia kontinua hatudu Aman Maromak nia fuan no laran-luak ba ema. Nuné, liturjia halo ita reflete konaba importansia husi halao ita nia moris anchorado iha domin no kompaixaun. Hanesan Jesus kura leproso (moras kulit ne’ebé a’at liu iha tempo Jesus nian no ema sira ne’e, sociedade exklui/la simu sira, marginalizado/a) ho poder/kbít no ‘kelembutan’, ita hetan bolu atu aproxima ba ema seluk ho empatia no ‘kindness’, especialmente ba sira ne’ebé marginalizado/a ou terus.
Leproso nia lia fuan ba Jesus mak ne’e: “ita hakarak karik, ita bele fo isin diak mai ha’u”, reflete nia dispozisaun no nia loke-an ba poder/kbít no vontade Maromak nian. Nia hatene katak nia hasoru mediku divino. Maibé, nia husik escolha ne’e ba Jesus, se Jesus hakarak kura nia ka lae. Jesus nia resposta mak ne’e: Ha’u hakarak. Sai diak ba!. Ida ne’e dehan ba ita katak Jesus hakarak kura ema leproso ne’e, no laós deit iha lia fuan. Maibé liu husi dalan asaun imediata ida. Jesus fo hikas ba leproso ne’e isin kulit saudavel ida, senso konfiansa nian ida, no halo nia aumenta iha nia fiar ne’ebé lori nia ba haklaken ba ema hot-hotu konaba saida mak akontese ba nia. Husi ema ida marginalizado, Jesus restaura nia moris, nia dignidade, restaura nia isin, klamar no espirito. Ita hasoru karik Jesus, saida mak ita husu ba Nia?
Ponto 3 ita bele reflete hamutuk:
Konfiansa no fiar!
Leproso nia hahalok aproxima ba Jesus hodi husu tulun mak hatudo nia konfiansa no fiar iha Jesus. Nia hatudo hahalok haraik-an no liberdade ida klean hodi husu se ita hakarak, kura ha’u ba. Nia hatudo fiar ida klean iha Jesus nia poder/kbít divino atu lori transformasaun no kura. Leproso ne’e hanorin ita ida-idak no ita hotu ema sarani atu hakiak atitude konfiansa no fiar iha Maromak nia providensia, nia laran luak no nia domin. Maromak sei kura ita nia ‘lepra sira’ se ita hakbesik ba nia ho konfiansa no fiar.
Poder/kbit husi orasaun!
Leproso hakbesik ba Jesus, hakneak no husu ba Nia atu kura ninia moras. Ida ne’e mak postura ita sarani nian wainhira hakbesik ba Maromak. Saun Markus konvida ita ema fiar nain sira atu haklean ita nia vida orasaun, buka Maromak nia guia, nia forsa no nia vontade, hodi nuné, ita bele sai instrumento kura no rekonsiliasaun nian ba ita nia maun-alin sira. Orasaun iha poder/kbít atu halo Jesus dehan ba ita: Ha’u kakarak. Nia transforma ita husi ema tuan ba ema foun. Nia restaura ita nia moris. Nia fo ba ita dignidade hanesan leproso esperiensia rasik. Jesus la rejeita wainhira ema kbít laek husu tulun.
Partilha Maromak nia domin!
Ema ne’ebé hetan diak ne’e, mesmo ke Jesus bando atu fo hatene ema, nia sai ba fo hatene ba ema hotu. Ida ne’e hanorin ita katak ita ida-idak no ita hot-hotu hetan bolu atu partilha Maromak nia domin no grasa ne’ebé ita hetan/simu ba ema seluk liu husi ita nia lia-fuan no hahalok no sai agente esperansa no transformadora iha familia, igreja no sociedade.
Ita habadak reflexaun ne’e hodi dehan katak leproso reprezenta terus no susar humanidade nian/ita ema nian, iha ne’ebé Jesus mai atu soi/liberta ba. Jesus mai ba ema sala nain sira, ba humanidade desfigurado. Nia revela fuan Aman Maromak nian ida ne’ebé domin nain no laran luak. Ita bele iha moras lepra kík sira: fiziku no espiritual. Ita preciza deit bolu ba Naí hodi husu nia kura ita. Atu nuné, ita sai lalenok Maromak nia fuan no laran luak nian ba ema seluk. So nuné deit mak ita bele hananu ho salmista: “Ita ha’u fatuk inan mahelik, haksolok ha’u ho ita Maksoin”. Amen! (lupersj)
(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)
1,182 total views, 6 views today
Bele hare Video Seluk :
Subscribe to Timorpost
