Baukau(timorpost)—Bispu Dioseze Baukau husu ba xefe suku sira ne’ebé eleitu husi povu no simu ona tomada de pose, tenke trata nia ema hanesan iha sira suku laran.
“Hau fo parabéns ba autoridade lokál sira ne’ebé eleitu husi komunidade no hetan toma de posse ona iha Timor-Leste laran tomak atu halo atendimentu hanesan ba nia ema iha suku laran”, Bispu Dioseze Baukau, Don Leandro Maria Alves ba Timor Post, Kinta (30/11) iha Baukau Vila Antiga
Don Leandro husu ba autoridade lokal sira hotu sai figura ne’ebe forte durante mandatu tinan hitu (7) nia laran bele lori transformasaun ba komunidade nia moris loro-loron iha ida-idak nia suku no aldeia tanba povu mak hili sira liu husi prosesu eleisaun. Iha prosesu ne’e, xefe suku balun re-eleitu no balun foun, foin eleitu husi povu. Sira ne’ebé foun, buka hala’o knar ho didi’ak tanba povu hare nudar figura ne’ebé bele akomoda povu nia hakarak atu halo transformasaun iha suku laran. Nune’e bele hamenus lamentasaun sira ba infraestrutura liga ba lurón, ba edukasaun, saúde, bee moos, agrikultura, bolsa da mãe, subsídiu terseira idade ne’ebé durante ne’e povu iha nivel baze halerik hela.
“Hanesan buat foun ida, ita buka atu hahú iha ita nia vida, liu-liu hatuur no akomoda buat hotu-hotu ne’ebé mak ita nia populasaun sira hein. Ita bele dehan estrada, saúde, edukasaun, ne’e duni lamentasaun oi-oin ba bolsa da mae, oinsá ita nia ferik no katuas bele moris diak. Hau hanoin sarani sira nia halerik, hau hanoin povu sira hein hela husi ita nia autoridade lokál foun sira,” amu fo hanoin.
Dom Leandro mos apela ba xefe suku sira atu buka sérviu hamutuk ho igreja, nudar ema sarani ho objetivu ida de’it katak servi povu no servi sarani.(#)
2,553 total views, 3 views today
Bele hare Video Seluk :