Baukau(timorpost)—Sub Komisaun Reguladór Arte Marsiais (KRAM) Baukau prontu atu ezekuta orden husi KRAM nasionál hodi re-fiskaliza estrutura no ranting arte marsiál hotu iha munisípiu too postu administrativu 6 hahu husi loron 3 too loron 30 fulan Dezembru.
Informasaun nee hato’o husi Prezidente sub-KRAM Baukau, padre Justiniano de Sousa SDB ba Timor Post, Sesta (1/12) iha Baukau.
Padre ne’e esplika, re-fiskalizasaun, tuir oráriu hahú iha loron 3 fulan ida nee, maibé preparasaun no koordenasaun sub–KRAM nian ho lider arte marsiál hotu iha Baukau durante nee la’o di’ak tebes.
Pároku Parókia Santa Teresinha do Menino Jesus Kelikai nee espera katak atividade ne’e sei la’o di’ak, ema hotu sei koopera, liu-liu lideransa arte marsiál. Nudar amu lulik nudar mós Baukau oan agradese ba governu nia desizaun hodi suspende arte marsiál sira nia atividade ne’ebe dala barak ona sempre halo ulun moras maibe iha ona orientasaun atu bele utiliza didi’ak arte marsiál ba dezenvolvimentu liu-liu iha area desportu nian .
“Hau hein katak ho desizaun governu nian suspensaun nee, katak kontinua la’o ho ninia programa atu hadi’a, taka total nee mak dala barak (la bele kontrola), se iha problema mosu karik ita la hatene atu komunika ho se? Tanba (sira) bele dehan ami (AM no AR) nia atividade taka tiha ona. Nune’e ita atu husu ba se? Maibe governu nia matenek ho suspensaun ne’e di’ak liu atu bele fo formasaun ba ita nia lider arte marsiál sira, ita nia membru arte marsiál sira tanba governu konsidera ninia oan sai mós rikusoin ida ba Timor Leste hodi prienxe ba dezenvolvimentu liu-liu ba area desportu nian,” dehan amu Justiniano.
Prezidente Sub KRAM ne’e hateten, desizaun governu nian la’o tiha ona, parte sub-KRAM Baukau nota katak iha baze dala barak liu problema mosu tanba kestaun tan rai, kestaun pesoál, maibé ninia indikasaun ne’e ema hatudu mak arte marsiál sira. Hotu-hitu hatene katak governu iha responsabilidade ba ninia ema, ninia nasaun atu rai ida ne’e la’o iha pas no estabilidade.
Tanba ne’e mak governu nia desizaun hasai sirkulár suspensaun atividade ba fulan 6. Iha fulan 6 nia laran, arte marsiál hotu-hotu tenke hakmatek iha ida-idak ninia fatin. Nune’e sei identifika arte marsiál sira hotu ninia estrutura, fatin treinamentu, sede, rejistu membru sira hotu hatama ba data base (baze de dados) governu nian hahú husi sub-KRAM too KRAM nasionál.
“Munisípiu Baukau ami sira sei la’o ba iha postu 6, halo fiskalizasaun no identifika arte marsiál sira hotu-hotu iha ninia estrutura, iha ninia fatin treinamentu, iha ninia sede, iha ninia membru ne’ebé rejistu ona tama ba data baze governu ninian hahú husi sub-KRAM too ba KRAM nasionál. Ho suspensaun fulan 6 ne’e, organizasaun hotu-hotu tenke kolabora, hakmatek iha ida-idak ninia fatin, labele hatais farda arbiru, labele halo movimentasaun bainhira governu fo ona hanoin ruma mak labele halo movimentasaun ba mai,” dehan amu Justiniano.
Hafoin simu orientasaun husi KRAM nasionál no enkontru entre lider arte marsiál sira hotu iha Baukau hahu husi loron 3 too loron 30 Dezembru sei halo re-fiskaliza ba ranting sira hotu hahu husi estrutura arte marsiál munisípiu too ba iha estrutura no ranting sira iha postu administrativu 6. Ranting sira ne’ebe mak la prienxe rekizitu husi governu ranting ne’e sei taka.(#)
4,062 total views, 3 views today
Bele hare Video Seluk :
Subscribe to Timorpost
