Dili (timorpost.com)—Sekretária Estadu ba Igualdade no Inkluzaun (SEII), hala’o sorumutu ho Asosiasaun Feto Potensiál husi munisípiu 13 oinsá feto maluk sira bele ativu iha oportunidade servisu, liuliu empoderamentu feto ba iha eleisaun suku ne’ebé mak sei realiza iha tempu badak.
Sekretária Estadu ba Igualdade no Inkluzaun (SEII), Elvina Sousa Carvalho, hatete soru mutu ne’e importante tebes tanba estabelese akordu ka kooperasaun ho Asosiasaun Feto Potensiál iha munisípiu sira atu lori sira pro-ativamente halo servisu iha empoderamentu feto ba iha eleisaun suku.
“Enkontru ne’e tama iha programa 120 dias. Tanba ita hatene katak Asosiasaun Feto sira durante ne’e, iha tinan barak atividade ida ne’e mak sei mai ho inisiativa ida, atu fó fundus hodi apoiu sira nia atividade iha munisipiu”. dehan Sekretaria Estadu ba Igualdade (SEII), Elvina Sousa Carvalho, iha Edifísiu SEI, Kinta (17/08).
Nia afirma, fundu kada munisípiu sei aloka osan ho montante 4,5000 mil dolar amerikanu, atu fó ba sira hodi halo preparasaun no mós atividade formasaun ba feto sira.
“Montante Jerál 53000 Mill, ne’ebé mak fó ba sira, ne’e tama iha fundus transferénsia ne’e foku liu ba eleisaun suku de’it. Orsamentu ne’e sei aloka tuir munisípiu sira hotu”.
Nia haktuir, Asosiasaun Feto sira nia servisu mak oinsá atu halibur feto potensiál sira iha munisípiu, fundus ne’e fó ba sira hodi halo atividade empodera ka fó formasaun hodi hakabit feto Sira”. Nia dehan.
Asosiasaun feto potensiál sira ne’e organizadu, tanba sira liu husi kongresu, sira organizadu, sira ne’e feto potensiál mak hamutuk iha asosiasaun, ne’ebé la’ós buat foun ba sira atu halo atividade sira.
SEII enkoraja iha eleisaun suku ida ne’e, sei iha númeru feto ne’ebé mak kandidatu aas, no mós sei iha feto ne’ebé mak eleitu sai xefe suku.
“Iha programa sosializasaun durante ne’e SEII atualmente Ita hare katak porsentu 100 xefe suku sira, feto ne’ebé mak lidera, sira lidera ho di’ak sira nu’udar autoridade lokál, ne’ebé mak hala’o sira nia kna’ar ho di’ak no responsabilidade”. Nia konta.
Importante mak feto brani kandidatu an, no mós hakat ho serteza, tanba mudansa de hanoin komesa iha, mezmu hetan problem Oioin maibé SEII fiar katak feto bele kompete.
1,421 total views, 3 views today
Bele hare Video Seluk :