Díli (timorpost.com) – Prezidente Partidu Kongresu Nasionál Rekonstrusaun Timorense (CNRT), Kay Rala Xanana Gusmão, promote bainhira CNRT kaer ukun sei hadi’a uluk jestaun finanseiru no polítika ekonomia estadu Timor-Leste nian ne’ebé daudaun ne’e monu tuir avaliasaun peritu internasionál sira.
Xanana hatete, nia rasik hasoru ona lider observadór mundiál balun inklui Embaixadór balun hatete, jestaun finansieru no pilar estadu nian komesa nakadoku, tanba sistema balun atuál Governu Lideradu Taur Matan Ruak no Mari Alkatiri, sobu hodi fó impaktu ba sistema jestaun administrasaun hodi afeita ekonomia Timor-Leste.
Tuir nia, mundu akompaña no haree hela situasaun polítika no ekonomia rai laran, povu tuur hakmatek, mosu prolema sosiál oin-oin no agora presu sasán nesidade báziku komesa sa’e makas iha merkadu no povu kiik nia moris.
“Ita-nia jestaun finanseiru agora ema sobu hotu, doador balun dehan ba ha’u, Timor agora la’òs ba oin, maibé tinan hirak ikus ne’e ami haree imi la’o fali ba kotuk. Tanba ne’e bainhira ita manan, ita ba sei hadi’a hotu foer sira ne’e para hadi’a fali ita nia pilar estadu nian ne’ebé nakadoko hodi dezenvolve ita-nia ekonomia la’o tuir regra, nune’e ema haree hosi liur sistema tenke metin, la’ós ba sobu agora hanesan imi hotu haree daudauk no sente saida maka akontese iha Governu ida ne’e, la halo buat ida, hanoin maka sobu de’it,” dehan Xanana durante konsolidasaun partidu CNRT iha Postu Metinaro, Munisípiu Dili.
Xanana dehan, ohin loron povu Timor-Leste mós loke matan, hodi ko’alia tuir sira-nia haree no kritika kontra Governu ida tuir sira-nia pensamentu bazeia ba faktus no realidade, katak, Governu ne’e fraku iha jestaun no polítika.
“Ohin loron povu loke matan, la presiza ita fó osan ba sira, sira hatene tanba iha demokrasia povu livre atu haree, saida maka akontese iha kotuk ba ne’e, sira haree no akompaña, povu agora hakarak haree partidu ida ne’ebé bele iha hanoin, objetivu, vizaun halo programa hadi’a povu nia moris,” dehan Xanana.
Komandante Em-Xefe das FALINTIL ne’e dehan, “CNRT Rezisténsia” moris atu liberta patria, no CNRT ida agora moris ho klamar CNRT Rezidénsia atu fó vitória liberta povu hosi mukit tuir prinsípiu ukun aan ne’ebé deside nanis ona hosi povu iha luta to’o ukun aan.
“CNRT ida uluk nia klamar moris nafatin ho CNRT ida agora, tanba ne’e ita iha konxiensia hodi hanoin, no ita-nia matan atu haree, no ita-nia ibun ko’alia hodi haree saida maka ita sente, buat ruma ne’ebé la’o kluk, ita hamutuk hodi hadi’a tiha,” nia hateten.
Nia apela ba militante se de’it maka atu vota ba CNRT, tenke haree hodi hanoin katak, CNRT iha duni programa atu hadi’a povu nia moris kalae!. Nune’e bainhira povu vota nia sei la arrepende.
Iha Fatin hanesan, Veteranu Postu Metinaro, Rai Lakan, apela ba povu Metinaro atu kontinua tau konfiansa ba Xanana nu’udar lider rezidénsia ne’ebé organiza povu manan independensia.
“Inan-aman sira di’ak liu hili partidu CNRT ho programa ne’ebé di’ak liu, tanba ne’e ita hamutuk lori ita-nia maun boot Xanana bele ba tuur iha Palasiu Governu hodi nia hadi’a ita-nia rain,” nia apela.
Nia dehan, vota ba CNRT hodi hanoin hikas ba istória konsulta popular 30 Agostu 1999 povu hotu vota ba CNRT mak lori Timor ba ukun aan.
“Agora ita vota ba CNRT hanesan iha 1999, ita hamutuk ho CRNT hodi tane avo hodi vota dala ida tan para nia bele hadi’a rai ne’e,” tenik nia.
Nia dehan, agora povu tenki loke matan hodi haree katak, iha situasaun krusiál povu hasoru susar laiha governante ida tun ba haree povu, Úniku Xanana maka hamutuk ho povu bainhira hasoru susar no terus.
“Aitonka tenke entrega fali ba maun Xanana, tanba ita haree tinan lima Governu ida ne’e la halo buat ida, ita susar mós Governu la preokupa,” nia lamenta.
Entretantun, Sekretariu Jerál Partidu CNRT, Francisco Kalbuadi Lay, agradese dezde eleisaun jerál 2017, Postu Metinaro votu tuba metin ba CNRT.
“Ha’u agradese dezde 2017 to’o mai agora CRNT manan hela de’it, no eleisaun prezidente foin lalais ne’e mós PR Horta maka manan iha ne’e,” nia agradese.
Kalbuadi husu atu ekipa sira ne’ebé simu pose atu servisu makas hodi tama sai uma komunidade nian hodi lori informasaun pozitivu bele atrai militante vota ba CNRT nu’udar partidu úniku ne’ebé iha programa di’ak atu hadi’a povu no nasaun.
“Komesa ohin ba oin konsoluta ita-nia povu hodi manan iha eleisaun parlamentar,” nia apela.
Iha oportunidade ne’e, Xanana no Sekjer CNRT, Francisco Kalbuadi Lay, simu mós afiliasaun membru partidu polítiku balun hodi deklara hamutuk ho CNRT.
Alende ne’e, Xanana ho Kalbuadia fó pose mós ba estrutura partidu CNRT Postu Metinaro kuaze na’in-50 hodi halo preparasaun servisu hasoru eleisaun parlamentar iha tempu besik.
2,824 total views, 6 views today
Bele hare Video Seluk :
Subscribe to Timorpost
