DILI—Komandu Polísia Nasionál Timor-Leste (PNTL), rekoñese ezisténsia tinan 21 Unidade Polísia Maritima (UPM), kontinua hasoru dezafiu asegura seguransa iha territóriu tasi Timor-Leste.
Segundu Komandante Jerál PNTL, Komisáriu Polísia Pedro Belo, hatete, UPM hasoru hela dezafiu hirak hanesan manutensaun no operasaun navios ne’ebé tuan ona, presiza iha manutensaun ne’ebé signifikativu.
Nune’e problema finansiamentu ne’ebé menus kauza insufisiente ba kombustivel, manutensaun mínimu, material ba peska/suku cadang menus no formasaun adekuada ne’ebé menus ba elementu UPM sira.
Iha tinan 21 UPM hasoru mós problema ho akizisaun navios, sistema komunikasaun la adekuadu no problema ho fornesimentu no re-abastesimentu ekipamentu ne’ebé bele fó risku ba membru sira iha sira nia servisu fatin, maka hanesan, balsas salva vida ne’ebé tuan ona, ekipamentu ba kombate inséndiu ne’ebé la funsiona ona, ekipamentu seguransa ne’ebé labele atu utiliza ona no mós ekipamentu seguransa jerál sira seluk.
“Mezmu UPM enfrenta problema hirak ne’e, liuhosi kompeténsia ne’ebé atribui husi lei ba PNTL no UPM la hamate membru UPM nia prontidaun, atu garante soberania no integridade ita nia fronteira maritima ho ami nia moto ne’ebé dehan servi no protégé,” nia deklara hafoin partisipa aniversáriu UNP, ne’ebé realiza iha Kuartél UPM Lesidere, Segunda (27/05/2025).
PNTL no espesialmente UPM sei nafatin servi ho fuan no laran tomak kontinua konstrui no konsolida forsa seguransa ida moderna no responde ho forma prontu no ativa mézmu ke hasoru dezafiu hirak ne’e hotu.
“Ikus liu ha’u hato’o ha’u nia agradesimentu no parabéns ba Komandante UPM, hamutuk ho estrutura no membru UPM, komandu husu nafatin ita boot sira, atu hatudu nafatin ita boot sira nia profisionalizmu, unidade, onestidade, loialidade atu kumpre papél fundamental atu asegura seguransa ba ema no bens sira no husu ita boot sira nia empeñamentu, dedikasaun atu mantein fó seguransa ba ita nia komunidade no mós ba ita nia fronteira tasi Maritima, tanba ita boot sira nia servisu ne’ebé professional Timor-Leste sei kontinua sai nasaun ida livre, pas, trankuilidade no seguru”, nia informa.
Tanba ne’e PNTL, hanesan instituisaun estadu atu defende legalidade demokrátiku, garante seguransa ba ema ho nia sasán sira no asegura direitu liberdade ema nian tuir termu konstituisaun no iha lei sira.
UPM hanesan Unidade Espesiál ida ne’ebé iha responsabilidade hodi asegura vijilánsia, patrullamentu no halo fiskalizasaun iha liña kosteira no domíniu públiku marítimu iha ámbitu ba prevensaun no kombate kriminalidade jerál no mós ilísitu sira seluk.
“Ohin-loron, importante tebes ita atu iha polítika nasionál hodi koloka tasi hanesan elementu sentrál ida iha operasionalizasaun estratéjia nasionál ba seguransa no dezenvolvimentu Timor-Leste, hanesan forma ida atu promove benefísiu ruma husi oportunidade sira ne’ebé maka iha, maibé liu mós husi risku no ameasa oi-oin no kompleksu ne’ebé iha poténsia prezudika interese nasionál”, nia afirma.
Iha kontestu ida ne’e, UPM assume papél sentrál ida hodi hasa’e volume patrullamentumaritima no aumenta fiskalizasaun ba peska ilegál sira, tráfiku umanu, tráfiku droga, tráfiku armas no kombate kriminalidade organiza da transnational no iha mós papél importante ida iha ámbitu salva guarda vida Humana iha tasi no salvamentu Maritima.
“Eziste issue sira mai husi nasionál, rejionál no global ne’ebé ezije presiza atu iha kapasidade ida ne’ebé as husi Unidade Polisia Maritima maka hanesan, seguransa portaria no seguransa ba rotas komersializa obrigasaun hodi kumpre konvensaun Maritima internasionál hodi bele permite ita atu Adere ba nasaun ASEAN sira hodi kombate efetivamente krime sira iha nivel lokál no transnational”, nia subliña.
Iha fatin hanesan, Komandante Unidade Polisia Maritima (UPM) Superintendente Polísia Eugenio Pereira, hatete, durante tinan 21, UPM sai hanesan mahon ba iha tasi Timor-Leste, ne’ebé define ona hanesan territóriu tasi TL ninian.
“Mahon iha ne’e nia sintidu katak, territóriu tasi Timor-Leste, presiza hetan protesaun seguransa, espesifika ente ba ninia rekursu sira iha tasi okos, nune’e mós sidadaun sira ne’ebé hala’o ninia movimentu atividade iha tasi, ami sei la permite, territóriu tasi TL, sai hanesan espasu no rute alternativu ba iha atividade krime organizadu sira, ami kontinua asegura seguransa”, nia hateten.
Tanba ne’e efetivu membru UPM hamutuk na’in-179, maibé balun kondisaun moras no problema idade sira labele halo servisu, rekursu ne’e iha kontinua asegura tasi Timor-Leste.
“Ami UPM efetivu la to’o 200, ami iha de’it na’in-179 efetivu, maibé balun moras ho idade sira labele halo servisu, tanba rekursu ne’ebé ami jere atu halo servisu asegura seguransa iha tasi Timor-Leste nian”, nia konta.
Hatán ba problema sira ne’e, Ministru Interior (MI), Francisco da Costa Guterres, rekoñese difikuldade sira ne’ebé UPM hasoru, kona-ba ekipamentu ho infraestrutura.
“Ha’u hatene iha tinan 21 nia laran, UPM iha difikuldade barak ne’ebé ita boot sira hasoru, kona-ba ekipamentu no infraestrutura, tanba ne’e nonu Governu sente ba ida ne’e, kontinua tau iha planu prioridade atu kria kondisaun di’ak ba UPM, ita halo dezeñu ba infraestrutura ho ekipamentu ida adekuadu ba ita boot sira atu uza atu bele dezempeña imi nia papél asegura seguransa iha territóriu Tasi Timor-Leste ho di’ak”, nia hakotu.
1,482 total views, 6 views today
Bele hare Video Seluk :
Subscribe to Timorpost
