(Reportajen Estaziadu Mariano Abi/Asistente Editor Hermenegildo Tilman)
Dili (Timor Post) – Vise-Ministru Administrasaun Estatál (V-MAE), Lino de Jesus Torrezão, informa, iha tinan ida ne’e nia laran governu sei konstrui Uma Kbiit Laek (UKL), hamutuk 4000 hosi Orsamentu Jerál Estadu Millaun 71 ne’ebé maka koloka ba iha programa ne’e .
“UKL tinan 2022, hamutuk rihun 4, hosi Orsamentu Jerál Estadu Millaun 71,” nia dehan ba jornalista sira hafoin remata konferénsia nasionál iha Salaun CNE Laline, Kinta (09/06).
Nia hatete, programa ne’e kontinua hanesan iha tinan kotuk nian ne’ebé kada kada uma ida ho montante dolar amerikanu rihun 14 to’o 17.
“Tanba distánsia, atu halo transportasaun ba material lokál no material fabrikadu ne’e dook, depois kustu rai henek no fatuk la hanesan, ne’e maka balu dolar amerikanu rihun 14 no balun dolar amerikanu rihun 17,” nia esplika.
Progresu konstrusaun ba Uma Kbiit Laek ba faze primeiru daudaun ne’e atinji porsentu 86, sei falta tan porsentu 14 hodi termina. Tanba ne’e agora daudaun governu sei buka meius oinsá mak bele lori lalais material sira ba fatin ne’ebé la asesu ba iha estrada.
“UKL faze primeiru ne’e hahú iha 2021 ne’ebé mak iha Uma hamutuk 1254, ninia progresu agora daudaun ne’e 86%, nune’e, 14% ne’e ba fatin ne’ebé mak la asesu estrada hodi lori material ba moos araska, ne’e mak to’o agora sei buka meius atu halo nusa bele hetan asesu ba estrada ne’ebé mak di’ak, mak foin lori material lokál no material fabrikadu ne’e ba iha ne’ebá,” nia subliña. (Lee Notísia Seluk Iha Jornál Timor Post/ Asesu You Tube Timor Post)
1,195 total views, 3 views today
Bele hare Video Seluk :
Subscribe to Timorpost
