DILI (Timor Post)- Komandu Polísia Nasionál Timor-Leste (PNTL), Munisípiu Dili, halo pasa revista ba motorizada hirak ne’ebé maka membru tránzitu sira uza hodi hala’o servisu.
“Ohin ita halo inspesaun ba transporte hanesan motorizada sira ne’ebé mak ita nia membru sira uza liu-liu sira Tránzitu sira uza hodi haree motor nia kondisaun inklui asesores motorizada sira no sira nia karta kondusaun,” dehan Komandante PNTL Munisípiu Dili, Superintendente Xefe Henrique da Costa, Iha edifísiu Kaikoli, Segunda (27/06).
Nia dehan, hosi rezultadu inspesaun ne’ebé halo identifika iha motor balun kondisaun aat no membru sira rai hela iha uma, nune’e ohin fó kedas orientasaun ba parte administrasaun no lojístika ba tula motor sira aat tau iha uma ne’e hodi lori mai rai iha office, tanba sasán Estadu ninia.
“Ita identifika membru sira balun nia karta kondusaun mate, tanba ne’e ita orienta sira tenke ba halo renovasaun, inklui kompleta asesores motór ne’ebé la kompletu,” nia deklara.
Inspesaun ne’e halo ba motorizada hamutuk 39 ne’ebé mak membru Tránzitu Munisípiu Dili uza, no iha motorizada ualu mak aat.
“Kona-ba karta kondusaun mate blanku laiha ne’e mak sira seidauk troka ne’e, ita sei prepara karta ida hodi aprezenta ba parte Diresaun Nasionál Transporte Terrestre (DNTT), hodi tau konsiderasaun atu nune’e bele renova ita nia membru sira nia karta kondusaun,” nia konfesa.
Inspesaun hanesan sei halo mós ba eskuadra hotu iha PNTL Munisípiu Dili.
2,799 total views, 3 views today
Bele hare Video Seluk :
Subscribe to Timorpost
