Dili (timorpost.com)—Tenente Jenerál Lere Anan Timur (LAT), Sesta (10/03/2023) halo konsolidasaun Partidu Frente Revolusionáriu Timor-Leste Independente (FRETILI) iha postu administrative Iliomar, munisípiu Lautem, hodi prepara-an di’ak liu ba eleisaun parlamentár 2023.
Lere hatete, Fretilin hakarak ka la-kohin tenke manan iha eleisaun ne’ebé sei akontese iha loron 21 fulan Maiu tinan 2023, úniku Fretilin ba governa mak bele rezolve problema povu nian, partidu seluk ba dala-ruma promesa bosok mak barak, tanba ne’e kuadrus no militante tenke iha prinsípiu no firme nafatin, labele nakdoko.
“Membru CCF segunda jerasaun ami na’in-sia, na’in-ualu mate ona, hela ha’u mesak, ida ne’e mak halo ha’u labele sees hosi Fretilin. Foin daudaun, ha’u husik kargu Panglima F-FDTL, tanba ha’u hadomi Fretilin, mai atu hametin partidu”, Lere Anan Timur haktuir.
Alende ida ne’e, LAT nu’udár Co-Prezidente TROICA aprezenta nia misaun rua ba kuadrus no militante sira, Lori FRETILIN ba ukun (governa) hosi 2023-2028 no Halo esforsu atu lider nasionál sira iha konsensu ba kestaun xave no estratéjiku sira ba dezenvolvimentu nasionál.
LAT konfirma sei sa’e palku kampaña hamutuk ho nia Prezidente Lú Olo no Sekretáriu Jerál, Mari Alkatiri hodi hato’o programa ne’ebé Fretilin sei implementa durante sira ukun.
LAT konklui nia intervensaun ba kuadrus no militante Postu Iliomar nian hodi hatete” Labele Sakrifika Fretilin tanba ha’u”.
LAT husu pergunta, imi hakarak Fretilin manan iha Iliomar ka lae? Maioria hatán ami hakarak “ami hakarak” LAT hatán, se nune’e Vota ba Fretilin.
Notísia ne’e asesu liuhosi via facebook, Rosio Fernandez nian, Sesta (10/03/2023).
1,580 total views, 3 views today
Bele hare Video Seluk :
Subscribe to Timorpost
