DILI (Timor Post)—Diretór Ezekutivu Asosiasaun Enjeñaria Petrolíferu Timor-Leste (AEP-TL), Noventinho Fernandes informa, tempu ona utiliza fundu petrolíferu hodi investe ba setór potensiál sira iha rai laran, nune’e bele aumenta reseitas nasaun nian iha futuru mai.
Nia dehan, hafoin Timór Leste halo ninia restaurasaun independénsia iha tinan 2002 to’o mai 2021, husi primeiru governu konstituisaun to’o oitavu governu, fonte úniku hodi sustenta mákina estadu ne’e mai husi fundu petrolíferu (FP).
Entaun husi primeiru konstituisaun to’o mai oitavu governu, Novenntinho hateten, gasta ona fundu petrolíferu maizu menus billiaun $16 hodi sustenta mákina estadu, ne’ebé jere hosi Timoroan rasik, maibé to’o agora povu kontinua moris iha situasaun ekonomia ne’ebé laiha serteza ba sira nia moris.
Tanba ne’e, tuir Diretór AEP-TL ne’e, katak sesé de’it maka ukun rai ida ne’e la’ós kestaun, importante maka tenke onestu, hahú ona hanoin uza fundu petrolíferu ne’e hodi investe fali ba area potensiál sira iha nasaun ida ne’e, para ba futuru bele aumenta reseitas nasaun nian.
Nia sujere, fundu petrolíferu ne’e bele investe iha area turizmu, otelaria, hasa’e produsaun agrikultura, peska no industrializa rikeza natural sira seluk, inklui loke desentralizasaun atu nune’e kada munisípiu bele iha ona ninia reseita rasik hodi bele selu ba estadu.
“Kuaze tinan 20 ona ita ukun an, ita nia fonte úniku sustenta mákina estadu mai husi fundu petrolíferu, tanba ne’e ha’u hanoin tempu ona, sesé de’it maka atu ukun importante hanoin ba povu nasaun ida ne’e. Uza fundu petrolíferu ne’e investe fali ba ita nia potensiál sira iha rai laran para ba oin sai mós fonte reseitas ba ita nia estadu,” Diretór AEP-TL, Noventinho ba Timor Post iha nia kna’ar fatin, Taibesi, sábadu,(07/08).
“Ita labele hanoin osan ne’e ita investe tenke mai kedas iha tinan ida rua nia laran, la’e. Maibé area potensiál sira hanesan turizmu, agrikultura, peska, otelaria no investe ba rikeza natural sira seluk hahú daudauk ona para bainhira to’o iha desentralizasaun ne’e kada munisípiu ida-idak iha ona reseitas permanente no fiksu,” Noventinho fo hanoin.
Nia afirma, utiliza FP ne’e hodi investe fali ba potensiál sira iha rai laran atu garantia sustentabilidade reseta nasaun ida ne’e nian, ne’e lalika tau kestaun, importante maka lider sira, ukun na’in sira ho laran duni atu investe pelumenus fó servisu ba Timoroan sira atu nune’e bele sustenta mós sira nia uma laran.
“Investimentu sira ne’e fó oportunidade servisu ba ita nia ema, ita nia sidadaun sira para mellora sira nia ekonomia família,” tenik Diretór AEP-TL ne’e.
Enkuantu investimentu potensiál natural sira nasaun ida ne’e, nia dehan, mínimu governu tenke forma ona desentralizasaun iha munisípiu sira ida-idak atu nune’e ba futuru sira rasik maka identifika sira nia potensiál ida-idak para ba futuru hodi hatama mós reseita ba estadu.(f10)
744 total views, 3 views today
Bele hare Video Seluk :
Subscribe to Timorpost
