Dili (timorpost.com) – Sekretária Estadu Kooperativa (SEKOOP) asina Memorandum of Understanding (MoU), ho Korea International Cooperation Agency (KOICA) husi Korea kona-ba fó formasaun iha area Produsaun Agríkola ba dirijente sira no Organizadór, Mobilizadór no Motivadór iha SEKOOP.
Sekretáriu Estadu Kooperativa SEKOOP Elizário Ferreira, hatete kooperasaun ba programa formasaun kona-ba produsaun agríkola ne’e liuhosi projetu ida naran HADALA, ho nia durasaun ba tinan lima.
“Nota entendimentu ne’e durasaun tinan lima atu nune’e bele asegura katak, agrikultór sira bele koñese didi’ak area sira nian atu bele kontribui ba hasa’e produsaun ai-han rai laran”, nia hateten iha Salaun Federasaun Hanai Malu iha Bairru-Pité, Segunda (09/01).
Nia dehan, bele renova nota entendimentu ne’e bainhira iha nesesidade presiza, no hahú iha tinan ida ne’e halo kooperasaun ho KOICA ba area formasaun liuliu reforsa area agríkola ba dirijente sira populasaun hotu-hotu ne’ebé opera iha agríkola.
Tanba ne’e mak Korea International Cooperation Agency (KOICA), liuhusi projetu HADALA sei fó formasaun ba fasilitadór sira atu iha koñesimentu sufisiente liuliu ba área produsaun agríkola.
Nia hatete, projetu ne’e atu melloramentu Kadeia de Valor Agríkola liuhusi partisipasaun Agrikultór sira iha Timor-Leste, atu nune’e sira bele organiza motiva, no liuliu halo formasaun dirijente kooperativa sira inklui estabelese Kooperativa Produsaun iha area produtivu sira bele kontribui ba dezenvolvimentu ai-han ka aumenta iha rai laran.
“Esforsu hirak ne’e bele asegura katak, ita iha situasaun saida de’it ita nafatin iha ai-han”, nia hateten.
Nia dehan, bainhira remata formasaun ne’e hotu parte KOICA hamutuk ho ekipa Formadór sira sei halo servisu parte rejiaun hanesan Aileu, Ainaru, no Likisá.
Alende ne’e Péritu Kooperativa Koreanu Jongick Jang, ne’ebé mós reprezentante meneger projetu HADALA, hatete sei hala’o serbisu hahú iha rai klaran liuliu ba área Kooperativa produsaun sira.
“Ba Setór Agríkola sei estabelese no opera kooperativa sira iha rejiaun mak hanesan, Aileu – Faularan, Ainaro – HoraiQuic no Likisá Camale – Hohoru”, nia dehan.
Portantu Formandu sira ne’ebé tuir formasaun hamutuk ema na’in-rua nulu (20) no tuir formasaun refere durante loron tolu.
1,932 total views, 3 views today
Bele hare Video Seluk :