BAUKAU (Timor Post)–Eletrisidade Timor-Leste empreza públiku (EDTL-ep), Baukau sei oferese bonus ba kliente sira ne’ebé ho voluntariamente aprezenta-an ba servisu EDTL, liuliu ba sira ne’ebé durante ne’e halo ligasaun ilegál.
Supervisór EDTL.ep Munisípiu Baukau, Edgar da Silva, afirma bonus ne’e oferese iha ámbitu aniversáriu EDTL.ep ba daruak nian.
“EDTL.EP sei oferese bonus ba kliente sira ne’ebé durante ne’e halo ligasaun ilegál, maibé voluntariamente aprezenta-an ligasaun ilegál, nune’e ekipa tékniku reativa ho gratuita”, Edgar hateten.
Iha oferese bonus ne’e, Edgar reafirma, ekipa tékniku komprometidu ona sei la aplika multa ba kliente sira ne’ebé voluntariamente aprezenta-an, tanba sistema prienxementu pulsa prepagu akapta, kliente balun ne’ebé durante ne’e monta ona kontadór prepagu maibé nafatin ilegál.
Listrik online ne’e ba kliente sira ne’ebé durante ne’e monta ona prepagu, maibé halo ligasaun ilegál ho voluntariumente halo rejistu, nune’e tékniku EDTL bele halo fali ligasaun normal no sei la aplika multa durante iha fulan ida nia laran.
Tuir nia, kliente sira ne’ebé halo ligasaun ilegál maibé la kumpre data ne’ebé determina, hahú husi fulan Juñu to’o loron ikus fulan Jullu, ekipa tékniku sei halo inspesaun, bainhira hetan ligasaun ilegál, sei foti medidas tuir dekretu lei númeru 33/2016, sei desliga no aplika koima ba kliente refere ho montante 15 USD to’o liu 1.000,00 USD, tuir kategoria konsumidór.
“Hanesan dirijente husu ba ita-nia maluk sira ne’ebé monta ona kontadór prepagu, maibé kontinua halo ligasaun ilegál, husu atu voluntariamente mai hato’o informasaun para ami bele ba halo fali ligasaun normal, ida ne’e hanesan bonus ami fó ba sira dentru fulan Jullu nia laran relasiona ho ami-nia aniversáriu ezisténsia EDTL.ep ba daruak nian, maibé kliente sira la mai liu loron 30 fulan Jullu, ami sei ba tesi kotu no fó sansaun selu koima tuir lei haruka”, Jerente RDTL.EP Baukau ne’e hateten ba Timor Post, iha nia knar fatin Vila Nova Baukau, Segunda (04/07).
Portantu, hahú tinan 2014 to’o agora EDTL.EP Baukau monta ona prepagu ba kliente sira liu rihun rua-nulu no posibilidade sei aumenta.
“Tanba daudaun ne’e ekipa tékniku kontinua monta prepagu iha postu adminitrativu Kelikai, Laga no Baguia”, nia katak.
Aleinde ne’e, iha mós problema ne’ebé daudaun ne’e funsionáriu sira enfrenta, nia dehan, mak menus kombustivel ense ba karreta atu hala’o servisu iha terenu.
2,674 total views, 6 views today
Bele hare Video Seluk :
Subscribe to Timorpost
