BAUKAU (timorpost.com)—Tersa feira (28/11) lokraik komandu polisia liu husi seksaun PIR (Polisia Intervensaun Rápida) kaptura membru GAM (Grupu Arte Marsiál) na’in rua husi Persaudaraan Setia Hati Terate (PSHT) iha Suku Gariuai Postu Administrativu Baukau Vila.
Komandante Polisia Baukau, Superintendente Xefe, Antoninho Mauluta konta, por volta tuku rua lokraik halo patrulla husi Baukau Vila ba Venilale. Fila husi Venilale tun mai area suku Gariuai iha aldeia Kairiri, sira hare husi dook, iha joven nain 2 hatais metan. Maibé ba besik, hare sira hatais farda arte marsiál PSHT nian. Sira nain rua ho inisiál OTS no CFX polisia kaptura lori mai komandu tuir prosesu identifikasaun tanba uza farda iha estrada públiku.
Nia esplika, razaun polisia kaptura membru grupu arte marsiál nain 2 ne’e bazeia ba rezolusaun governu nian númeru 45/2023, 10 Novembru ne’ebé kona ba suspensaun arte marsiál sira.
“Sira na’in rua la’ós pratika treinu ka asaun ruma maibé hatais atributu arte marsiál nian tanba tuir ita nia rezolusaun fó sai katak data ne’ebé termina ona iha rezolusaun ne’e dehan katak arte marsiál sira ne’ebé hetan suspensaun hotu ne’e labele hala’o treinu, labele uza farda la’o iha estrada públiku”. dehan Antoninho Mauluta ba Timor Post, kuarta (29/11) iha nia knar fatin
Lei ne’e fó kompeténsia barak liu mai iha PNTL atu halo servisu tanba ne’e horisehik polisia hare joven balun uza farda la’o iha estrada públiku entaun lori mai hasai tiha farda ne’e. Depois polisia tula fali joven na’in rua ba fali sira nia uma.
Nia afirma, durante ne’e parte komandu polisia hamutuk ho KRAM (Komisaun Reguladora Arte Marsiál) bolu ona sira nia lideransa sira fó hatene no mos komandu polisia munisípiu Baukau fó ona avizu dala barak iha enkontru, iha media, iha fatin públiku no iha igreja maibé kuandu membru grupu arte marsiál nafatin la kumpre, mak polisia sei foti medida rigorozu.(#)
3,071 total views, 9 views today
Bele hare Video Seluk :
Subscribe to Timorpost
