Baukau (Timor Post)—Professors Eskola Ensinu Bázika Sentral (EEBC sigla Portugués) 03 Villa-Nova Baukau prontu ona fó ezame ba estudante sétimo no oitavo ano iha loron 18-27 Novembru
Diretór EEBC 03 Villa-Nova Baukau Paulino S. Freitas, iha entrevista ho Timor Post, Sábadu (13/11/2021), orientasaun superior ba sira hala’o prosesu ida ne’e hotu ona.
“Ami simu orientasaun husi ami nia superior, diretór edukasaun munisípiu katak, ami hahú ezame pasajen klase iha dia 18 to’o 26 Novembru. Ba estudante nono ano, dia 13-15 Dezembru ezame nasionál no ezame lokál dia 18 Dezembru,” haktuir Paulino.
Prosesu preparasaun hotu ona tanba profesores sira entrega hotu ona matéria, prosesu imprime mós hotu ona, pakote hatama imprime hotu ona hein de’it atu ezame”, hateten Paulino.
Entretantu total estudante hahú husi sétimu to’o nono ano hamutuk rihun ida tolu (1003) kompostu husi sétimu ho oitavu ano atus neen haat nulu resin sia (649) mak sei tuir ezame pasajen klase no estudante na’in atus tolu lima nulu resin haat (354).
“Atu pasa iha ezame pasajen klase ne’e ou lae desizaun iha estudante ida-idak nia liman la’ós professor/profesora nia liman, tanba sira mak estuda no matéria ezame bazeia ba kritériu ne’ebé iha no avaliasaun manorin na’in nian”, dehan diretór eskola.
Angelo da Conceição, estudante eskola ne’e hateten nia prontu ona atu partisipa ezame iha loron 18 fulan Novembru.
“Ami estudante prontu ona atu partisipa ezame iha kualkér tempu tanba antes ne’e ami nia professors sira fó rezume matéria no halo les tambahan mai ami”, dehan Angelo.
Tuir observasaun jornalista nian iha eskola EEBC 03 Vila-nova inklui estudante husi eskola sira mós seluk prepara partisipa ezame pasajen tinan 2021. (gut)
1,073 total views, 3 views today
Bele hare Video Seluk :