(Reportajen : Caetano Guterres /Editor Marcos Fernandes)
BAUKAU (Timor Post)— Sidadaun sira iha Tirilolo, Postu Administrativu Baukau Vila, dadeer de’it tuku 6:30 forma ona iha sentru votasaun EBC 01 Tirilolo hodi ezerse sira nia direitu.
Eleitór Angelina Ximenes ho idade maizumenus 73 mós ba hola parte iha sentru votasaun hodi ezerse nia direitu síviku, maske sente kolen maibé la halakon ninia espíritu.
“Mezmu ha’u ferik ona, la’o arraska, maibé hakarak mai tuir vota, tanba nu’udar sidadaun ne’ebé di’ak tenke ezerse ha’u nia direitu atu hili ita nia aman nasaun”, dehan eleitór Angelina Ximenes, ba Timor Post iha Sentru Votasaun EBC 01 Tirilolo Baukau Vila, Tersa (19/04).
Nia hatete, entre kandidatu na’in rua ne’e ida, bainhira povu fó fiar atu sai Presidente Repúblika, sai prezidente ba povu tomak no kumpre promesa sira ne’ebé hato’o ona durante tempu kampaña eleitorál.
Iha fatin hanesan, eleitór José A. Belo hatete, eleisaun segundu volta importante ba Timor oan sira hotu atu hili ema númeru ida iha nasaun ne’e, tanba nia maka sai nu’udar símbolu unidade nasionál no aman ba nasaun.
“Ita hanesan sidadaun presiza ba fó ita nia votu iha eleisaun segundu volta nian, tanba ita atu hili ema númeru ida importante iha nasaun ne’e”, nia apela.
Tuir observasaun jornalista Timor Post nian iha sentru votasaun eskola ensinu báziku 01 Tirilolo hetan Seguransa hosi Polísia Nasionál Timor Leste no observa no fiskais sira.
1,057 total views, 3 views today
Bele hare Video Seluk :