REMEXIO (timorpost.com) — Estrada Diresaun iha Aldeia Lerolisa (Banin ninian), suku Asumau, Postu Administrativu Remexio, Munisípiu Aileu Kondisaun aat, no rai monu taka estrada difikulta tebes movimentu transporte ba no mai, Remexio-Aileu no Remexio-Dili.
Motorista José Moniz da Cruz, sente triste tanba tinan barak ONA, maibé Governu liuliu Ministériu Obra públiku (MOP), la tau atensaun ba estrada ne’e.
“Ha’u hanesan motorista sente triste tebes, baihira halo movimentu ba no mai”, nia hateten ba Timor Post iha Lerolisa Remexio, Sábadu (26/11).
Nia dehan, haree kondisaun estrada ne’e, sente tauk atu halo movimentu, maibé obrigadu tenke liuhosi ne’e, tanba laiha tan dalan seluk.
“Tanba ne’e ha’u husu ba Governu liuliu Ministériu Obra públiku (MOP), mai hadi’a ami-nia estrada ne’e antes mosu asidente”, nia afirma.
Nia hatete, tempu udan hanesan ne’e rai halai, tanba ne’e mak halo estrada aat hotu, hanesan iha mota boot nian hali ba to’o iha Banin nian ne’e aat tebes no bele ameasa ba ema-nia vida.
“Estrada ne’e di’ak mak karreta bele lori produtu lokál sira ne’ebé komunidade produs ne’e ba fa’an iha merkadu, maibé estrada aat hanesan ne’e oinsá karreta bele sirkula”, José haktuir.
Nia subliña, realidade mak ne’e, tempu udan hanesan ne’e rai komesa nakonu iha estrada laran no halo rai namdoras no ameasa karreta bele tun ba rai naruk.
Alende ne’e iha fatin ketak, administradór postu administrativu Remexio, Gastão Mendonça, hatete loos duni kondisaun estrada Remexio aat tebes, maibé iha tempu badak nia laran konstrusaun bele hahú ona.
“Ita-nia dalan agora iha ona prosesu nia laran, kompañia sira ne’ebé hola responsabilidade konstrusaun estrada ne’e iha ona, tanba ne’e mak Ministériu Obra Publika mai to’o ona iha ne’e informa ba ita katak, estrada hahú hosi kruzamentu tama iha ne’e, ita bele garantidu katak iha fulan Novembru ou Dezembru hanesan ne’e hahú ona konstrusaun”, nia haktuir.
Administradór hatete, kompañia ne’ebé responsavel ba estrada refere, tuir Ministériu Obra Publika, katak kompañia sira ne’e tama ona iha prosesu nia laran.
2,336 total views, 3 views today
Bele hare Video Seluk :
Subscribe to Timorpost
