DILI, (timorpost.com)— Komisaun Anti Korrupsaun (KAK) to’o agora seidauk finaliza prosesu averiguasaun ba kazu fa’an uma estadu iha área Fulolo, aldeia Sanane, suku Costa, sub-rejiaun Pante Makasar, Rejiaun Administrativa Espesiál Oekusi Ambeno (RAEOA) husi Eis Prezidente Autoridade RAEOA, Arsénio Paixão Bano, ba Eis Prezidente Autoridade RAEOA, Mari Bin Amude Alkatiri.
Maske nune’e, prosesu averiguasaun daudauk ne’e kontinua la’o hela tanba dokumentu KAK seidauk rekolla hotu.
“Eis autoridade RAEOA seidauk entrega dokumentu mai ita, entaun ami labele halo inkéritu, ita hein prosesu investigasaun, agora ami atu ba REAOA mais to’o agora ami-nia komisáriu KAK seidauk iha ne’e”, Diretór Jeral Investigasaun iha KAK, José Verdial Araújo, informa ba jornalista sira iha nia kna’ar fatin, Faról, Segunda, (18/03).
Tanba ne’e, laiha komisáriu KAK defikulta servisu iha KAK liuliu labele ba RAEOA hodi rekolla dokumentu relevante kona-ba kazu sira iha RAEOA.
Antes ne’e, Arsénio Paixão Bano, nu’udar Prezidente Autoridade RAEOA iha momentu ne’ebá hatete, nia fa’an duni rezidénsia Fulolo ba eis Prezidente Autoridade RAEOA, Mari Alkatiri, ho razaun katak nu’udar autoridade bele fó aluga no fa’an tanba rezidénsia refere rezidénsia privadu, atu nune’e bele hetan osan hodi harii fali rezidénsia foun, tanba rezidénsia refere la’os rezidénsia estadu maibé ne’e rezidénsia privadu, entaun bele fa’an no fó aluga hodi hetan osan para halo dezenvolvimentu seluk.(*)
516 total views, 3 views today
Bele hare Video Seluk :