Lider Karizmátiku Timor-Leste, atuál Primeiru Ministru (PM), José Alexandre Kay Rala Xanana Gusmão, la’ós kontra desizaun Tribunál, maibé fó solidariedade ba povu kbiit laek, ne’ebé sofre desizaun hosi Tribunál Judisiál Primeira Instánsia Dílí, (TJPID).
Iha terenu, Primeiru Ministru konta, uluk ha’u defende vítima na’in-hitu nu’udár sidadaun, agora kontinua defende familia hirak ne’e, hanesan Primeiru Ministru nonu Governu konstitusionál.
Kazu ne’e, bazeia mandadu TJPID, liuhusi karta notifikasaun hakarak hasai obrigatóriu uma-kain-hitu, ne’ebé lokaliza iha Aldeia Bekuse-Kraik, Suku Bekora, Postu Administrativu Kristu Rei, Munisípiu Dili.
Tanba ne’e maka Xefe Governu hamriik metin ho ninia ezisténsia hodi defende povu kbi’it laek sira nia direitu, tanba povu sira nia sasán, ekipa TJPID hasai hotu mai iha li’ur no sasán balun naklekar iha rai-leten.
Xanana akompaña ho tristeza, katak situasaun ne’ebé vítima sira hasoru, atu soe piadas ba Autoridade Judisiáriu iha Timor-Leste. Hodi dehan labarik sira ba estuda sai Juiz, Prokuradór no Polisia Sientifiku Investigasaun Kriminál (PSIK), atu sobu ema nia uma arbiru. Ama sira ba te’in fó han oan, oan sira boot, duni fali ki’ik sira.
Maibé, rai ne’e iha tinan 1979, entrega verbalmente husi sidadaun ida ho naran Vicente Vidigal (matebian) ba vítima sira hodi hela, iha tinan 2013, ninia bei-oan kontesta ba Tribunal, ikús mai Tribunal deside entrega Coisa Certa ba família hirak ne’e.
Lider nasionál to’o iha fatin akontesimentu, vítima sira hahú kesar sira nia susar no terus ho mata-been, razaun lamenta ho desizaun Tribunal nian. Iha terrenu mós labarik sira balun tanis hodi hakilar dehan “Avo-Avo”.
Lakleur Ofisiál Justisa sira hakbesik-an ba Primeiru Ministru, tenta hodi esplika prosesu tomak, maibé, Xanana lakohi atu rona, tanba desizaun ne’e hanesan de’it ho desizaun sira antes, ne’ebé nia husu atu haruka Juíz ne’ebé maka hasai desizaun maka atu ba esplika rasik.
Ho disputa rai ne’e, ofisiál sira tenke suspende provizóriu evikasaun, tanba prezensa Primeiru Ministru iha Bekusi-Kraik, atu husu Tribunál, hodi suspende lai ezekusaun ne’e.
Nune’e Xefe Xefe Governu bele fila-fali, hodi hala’o servisu Estadu nian, tanba nia (Xanana) dehan, kuandu la suspende eviksaun maka sei hela nafatin iha iha fatin ne’e ho razaun Juiz sira nia desizaun la respeita ona povu nia direitu umanu.
Antes ne’e, Konsellu Superiór Majistratura Judisiáriu, konsidera desizaun Tribunál Judisiál Primeira Instánsia ba prosesu kazu ezekusaun (eviksaun) halo hasoru familia hitu iha Bekusi-Kraik adekuadu.
Nia la kontra desizaun Tribunál, maibé husu atu Juiz sira presiza tetu sira nia desizaun, hodi haree ba interese povu nian. Tanba Estadu ne’e eziste tanba povu nia sakrifísiu no terus.
2,582 total views, 3 views today
Bele hare Video Seluk :
Subscribe to Timorpost
