DILI, (timorpost.com)— Diretór Prizaun Gleno, Cristiano Salsinha, hatete, tuir dadus daudauk ne’e dadur feto iha Gleno hamutuk 17, no iha ida mak sofre hela defisiénsia mentál.
“Sira-nia kondisaun di’ak, dadur feto ida mak moras metál mais ita kontinua halo tratamentu nafatin ba nian, kona-ba moras sira seluk laiha situasaun di’ak hela, ita haree ba iha kondisaun feto nian, ita haree uluk no agora lahanesan tanba agora ne’e sira-nia fatin hela ba ne’e di’ak’, dehan Cristiano ba Timor Post liuhosi telefone, Sesta, (08/03).
Nia dehan, dadur feto sira ne’e loron halo atividade mak kostura, ba eskola no balun tuir formassun fahe informasaun kona-ba Bíblia, balun mós tuir formasaun atu halo primeira komuñaun.
“Dadus sira ne’e iha menoridade iha rua, adultu iha 15, dadur feto sira ne’e komete kazu omesídiu, inpatijia no balun brankamentu kapitál”, dehan nia.
Iha sorin seluk, Direitor Prizaun Bekora, Nito do Santos, hatete iha prizaun Bekora dadur feto laiha tanba iha prizaun Bekora ne’e tau de’it dadur mane sira, prizoneira hotu-hotu dadur iha Gleno.
“ha’u hakarak hatete de’it ba ita-boot sira katak iha Bekora ne’e dadur mane de’it, dadur feto mós iha maibé provizoriu de’it, banhira sira moras, entaun prizaun husi Gleno enkamina mai Bekora hodi halo tratamentu, enkuantu sira kondisaun di’ak fali ita haruka fila-fali ba prizaun Gleno”, hakotu.(*)
1,773 total views, 3 views today
Bele hare Video Seluk :