BAUKAU, (timorpos.com)–Lei numeru 9/2016 la fo dalan ba autoridade suku hanesan xefe suku, lia nain no xefe aldeia atu halo intervensaun ba kazu sivil no kazu publiku maibe iha de’it kompeténsia mak halo aprosimasaun no mediasaun.
Informasaun nee hatoo husi Xefe Suku Gariuai, Postu Administrativu Baukau Vila, Arlindo Freitas Belo relasiona ho kazu disputa rai entre feto-san no uma-mane iha knua Bahamori.
Nia esplika, kazu disputa rai, parte rua iha nivel aldeia seidauk rezolve, nune’e sira lori ba nivel suku. Tanba ne’e lia nain suku nian buka halo mediasaun iha fulan ida nee. Se parte rua la simu malu liu husi mediasaun lideransa suku, posibilidade sei iha mediasaun husi ministériu interior maibe se parte rua la simu malu hakarak ka lakohi kontinua ba ministeriu publiku.
“Kazu disputa rai nee hahú iha 2022. Momentu neeba parte aldeia (xefe) Bahamori halo tiha ona mediasaun lubuk ida, liu husi kultura mos lubuk ida, aseita malu, la aseita malu ikus liu mak sira bolu malu dehan liu husi prosesu legal de’it ona, mak ohin loron sira bolu malu mai halo mediasaun iha suku bainhira kontinua la aseita malu iha prosesu mediasaun nee ami husi suku halo karta akompañamentu ba parte rua hodi kontinua ba iha ministériu públiku,” dehan Arlindo ba Timor Post, sesta (8/12) bainhira remata partisipa loron mundiál ema ho defisiente.
“Liu husi mediasaun iha suku nia halo mak parte rua la simu malu, ami sei fo tempu loron tolu atu parte rua toma desizaun ruma maibé kuandu kontinua la simu malu mak ami sei bolu tan mediadór husi ministériu interior nian halo mediasaun maibé husi ministériu interior nian mai halo mediasaun mak sira la simu malu nafatin ba dalan prosesu legal,” dehan Arlindo.
Xefe suku re-eleitu ne’e ho laran triste husu ba parte rua ne’ebé la’ós ema seluk ho ema leet, mesak feto-san no uma-mane atu komprende malu hodi rezolve kazu disputa nee liu husi dalan kultura. Nune’e labele rai hela todan ba jerasaun foun tuir mai tanba kuandu kazu disputa rai lori ba dalan justisa, konserteza ida manan no ida lakon, maibé kria hela opozisaun ba foin sa’e sira iha família laran.
“Liu husi meiu komunikasaun nee, ha’u husu ba parte rua atu simu malu no konsidera malu tanba rai metin hela, ita ema mak troka malu no bainhira lori malu ba tribunal mak sei mosu família ho família sei sai opozisaun ba malu sei husik presedente ida la di’ak ba jerasaun sira tuir mai tanba nee hanesan autoridade kontinua hakbesik parte rua nee kontinua fo hanoin ba sira. Mas kuandu parte ida mak lakohi simu konserteza dalan ikus mak lori malu ba tribunal,” nia fo hanoin.
Iha fatin hanesan lia nain suku Gariuai, Sebastião da Silva ne’ebé halo mediasaun ba disputa rai ne’e hateten sira mesak família. Nune’e halo mediasaun maibé sira la tuir malu, maibé halo fali mediasaun ho kultura feto-san no uma-mane nian, ikus mai parte rua konsidera malu dehan família.
“Entaun ha’u fo fila fali ba sira nain rua lori fila fali ba buka aprosima malu iha família laran durante tempu semana ida. Hafoin nee, hau simu fali rezultadu ikus husi lia nain sira iha loron sesta feira semana oin (ne’e). Se sira tuir (konkorda) malu, parte ida sei lori bibi ida no parte seluk sei lori fahi atu dame malu tuir serimónia kultura nian, no ha’u sei konvida xefe suku ho xefe aldeia nain 8 atu partisipa,” dehan lia nain.
Lia nain nee esplika, bainhira konkluzaun dame malu ho kultura neebe mak nia fo ba parte rua la konkorda malu, hanesan mediadór nia sei avansa tan ba mediasaun da-ruak nian maibé nia garante katak durante semana ida parte rua sei simu malu tanba sira la’ós ema seluk ho ema leet mak desputa ba malu.(#)
2,991 total views, 3 views today
Bele hare Video Seluk :
Subscribe to Timorpost
