DILI (timorpost.com)—Tribunal Distritál Dili (TDD), liuhusi juis prosesu Ana Paula Fonseca, omóloga krime ameasa, tanba lezada ho naran inisiál IdPS hakarak dame malu ho arguidu JCF.
Haree husi krime ameasa nia natureza ne’e semi públiku, lei fó dalan ba tribunal atu omóloga keixa ne’e, bainhira lezada hakarak dada fali keixa ne’e.
Tanba ne’e, antes atu julgamentu, liuhusi tentativa akonsiliasaun ne’ebé tribunal halo ne’e entre parte rua, lezada deside taka prosesu ne’e, tanba lezada promete sei selu osan ne’e.
Aleinde ne’e, iha sala julgamentu laran, arguidu mós aseita ho lezada nia deklarasaun, arguidu mós promete iha futuru sei la halo tan krime hasoru lezada.
Lezada mós husu tribunal atu fó hanoin ba arguidu iha futuru labele halo tan hahalok ne’e.
Rona tiha arguidu ho lezada, juis prosesu omóloga prosesu ne’e, no absolve arguidu husi instánsia.
Tribunal mós fó hanoin ba arguidu katak, iha futuru labele halo tan hahalok ne’e no tribunal husu ba lezada ba futuru labele deve tan osan, se hakarak deve tenke seluk fali.
Tuir faktus argidu ho lezada Imaculada de Fátima Pereira Saldanha, antes ne’e iha ona problema entre sira, tanba lezada deve argidu nia osan to’o agora seidauk selu hotu.
Iha loron 14 fulan Dezembru tinan 2021, hale’u tuku 17h 15, arguidu ba buka lezada iha nia uma iha suku Madohi-Dili, hodi husu kona-ba osan ne’ebé lezada deve, hodi mosu diskusaun uitoan hafoin arguidu ko’alia ameasa hodi dehan, “se imi fa’an uma ne’e ba ema seluk”.
Rona lia fuan ameasa ne’e, lezada sente ta’uk no trauma sente la seguru, hodi prejudika nia liberdade hodi lezada ba hato’o keixa ba Polisia. Konsekuénsia husi arguidu nia lia fuan ameasa ne’e mak halo lezada sente ta’uk, no halo nia labele sai husi uma hodi halo nia atividade hanesan bai-bain.
Arguidu hatene nanis katak, hasai lia fuan ameasa sira ne’e, bele halo ema sente ta’uk, la sai husi uma, arguidu la tahan nia-an, no arguidu, halo tuir nia hakarak rasik, konxiente no hatene momoos katak hahalok hanesan ne’e la di’ak no lei mós bandu, la hanoin atu sees-an hosi hahalok ne’e.
Haree ba hahalok sira ne’e, arguidu nu’udar autór material ho forma-konsumada (halo duni ona) ba krime ida ameasa, p. e p. tuir artigu da-157 K.P.
Iha audiénsia ne’e prezide husi juis singular Ana Paula Fonseca, MP reprezenta husi prokuradór Osorio, arguidu hetan asisténsia legal husi defensór Pedro Aparício.
2,811 total views, 3 views today
Bele hare Video Seluk :
Subscribe to Timorpost
