(TimorPost.com)—Tribunál Distritál Dili (TDD), Kuarta (31/05/2023), liuhusi desizaun final, absolve arguidu José Maria dos Reis, Barto- lomeu Sequeira ho João Baptista Fernandes Alves, husi krime fraude fiskál.
Tribunal absolve arguidu na’in-tolu husi krime ne’ebé Ministériu Públiku akuza, tanba tribunal haree no konsidera akuzasaun husi Ministériu Públiku nian la aprovadu, razaun arguidu na’in-tolu la’ós sósiu ba kompañia Sunshine Petrol Group ne’e, maibé iha fali ema seluk.
Entertantu, tuir akuzasaun husi Ministériu Públiku, katak iha loron 5 Novembru 2002 to’o 24 Juñu tinan 2016, empreza Sunshine Petrol Group hahú rejistu ho TIN 1018089 ho sede rua Audi’an, Vera Cruz Dili, konsórsiu Joao B.F Alves ho sósiu 404 (saham) Bartolomeu Sequeira 3046 no José Reis ho sósiu 30 ho atividade ekonómika komersiál kombustivel ba veíkulu sira.
Iha tinan 2009 no 2011 empreza ne’e kontratu ho governu hodi fornese mina ba EDTL. Iha loron 10 Novembru 2010, Estadu RDTL halo ona pagamentu ba konta bankária empreza Sunshine Petrol Group ho númeru konta 193544210001 ho montante $5.235.637.52 dolar amerikanu, tuir TPO 10211955.
Loron 25 Maiu to’o 29 Dezembru 2010, diresaun nasionál alfándega loke armazena empreza ba mina ho stoke litru 17.435.105. Husi inspesaun ne’e, identifika kompañia seidauk selu taxa ho montante $1.215.907.09. Empreza iha obrigasaun selu 0,56 kada fulan husi rendimentu.
Empreza refere hahú rejistu iha sistema impostu doméstika (SIGTAS) iha loron 1 fulan-Juñu 2003, apenas deklara tribunal. Agostu 2004 too 2011 empreza hahú selu taxa ba Estadu ho osan $4.965.50. Maibé, Agostu 2004 to’o Marsu 2007 Sunshine Petrol Group nunka deklara ba impostu kona-ba sira-nian rendimentu.
Fulan Abríl 2007 to’o 2011 empreza ne’e hahú selu impostu ba sira-nian rendimentu ho val- or $304.017.85. Tinan 2011 to’o 2016 la selu ona taxa ba Estadu inklui la deklara rendimentu ba iha Diresaun Impostu Doméstiku.
Ministériu Públiku konsidera arguidu sira ho intensaun hakarak hasees an husi pagamentu ba taxa no impostu, hodi bosok autoridade alfándega, katak Ministériu Finansas seidauk halo pagamentu ba mina ne’ebé sira fornese, maibé faktu hatudu empreza ne’e hetan ona transferénsia.
Ho hahalok arguidu sira nian ne’e, Ministériu Públiku konsidera Estadu sofre prejuizu ho montante $1.215.907.09. Nune’e akuza arguidu na’in-to-lu ho krime fraude fiskál, ne’ebé previstu iha artigu 314, númeru 2 husi Kódigu Penal.
Audiénsia julgamentu ne’e prezide husi juis koletivu José Gonçalves, Alvaro Maria ho Argentino Nunes, Ministériu Públiku reprezenta husi prokuradora Lidia Soares, no arguidu sira hetan asisténsia husi advogadu privadu na’in rua, José Guterres ho Arlindo Sanches.
693 total views, 3 views today
