DILI, ( timorpost.com)— Akadémiku Universidade Nasionál Timor-Lorosa’e (UNTL), José da Costa Magno, husu Governu da-IX atu esplika kle’an ba públiku kona-ba kanselamentu rehabilitasaun ba Aeroportu Internasionál Prezidente Nicolau Lobato (AIPNL), Kumoro, Dili.
Akadémiku UNTL ne’e hatete Governu anteriór halo ona lansamentu maibé Governu da-IX kansela fali, klaru iha era dijitál buat hotu teknolojia mak sai hanesan alvu ba nasaun hotu, maibé presiza esklarese ba públiku kona-ba dezeñu aeroportu nian ne’ebé la kondis ho mundu dijitalizasaun.
“Klaru Governu ida agora ne’e karik nia iha planu ne’ebé mais sertu, maibé prezisa esplikasaun, problema ne’e la’os ita ukun ne’e ita bele kansela, maibé ita ukun ne’e atu esplika tanba sasán ne’e povu nian, ne’ebé ita sira ne’ebé kompete ba iha partidu polítika no kargu ne’e tinan 5 de’it maibé povu ne’e tinan ba tinan iha hela de’it, moris iha rai ida-ne’e”, dehan José Magno, ba Timor Post iha salaun CNE, Sábadu, (03/02).
Espera katak Timor-Leste iha aeroportu ida ne’ebé mak di’ak no fó espasu ba aviaun boot sira bele mai vizita Timor, ne’e di’ak tebes ba Timor nia progresu. Tanba ne’e, buat balun ne’ebé karik públiku prezisa, esplika netik para depois akadémiku sira-nia esperansa, ema sira ne’ebé servisu iha ajénsia aviasaun ne’e sira bele sente katak mudansa balun atu akontese no sente katak futuru Timor komesa hadi’a daudauk ona.
” Ita bele dehan katak rendimentu nasionál husi parte balun mós husi vizita husi rai-liur, ita nia ema sira iha rai-laran mós bele kria ajénsia barak hodi fasilita viajen, no aeroportu servisu sira ne’ebé aviasaun, kestaun sira ne’e liga ba ajénsia importante tebes. See ida-ne’e kansela duni, prezisa esplikasaun nune’e para ema hotu bele hein no sente. Ita kuandu ba ema-nia rai haree sira-nia aeroportu ne’e kontenti, maibé mai to’o Dili ne’e haree aeroportu sente kuaze hanesan aldeia ida”, Akadémiku ne’e espresa.
Alende ne’e nia dehan, “Rai ne’e prezisa progresu, see karik Governu kansela esplika hodi ema bele hatene, tanba aeroportu bele dehan ema obriga-an atu mai, ida-ne’e Timor nia espíritu Governnamentalizmu mak seidauk iha ho loloos, hotu-hotu sente katak sira ukun nasaun no Estadu ne’e sira nian, maibé loloos ne’e tenke hatene Governu ne’e peosál sira ukun tuir tinan de’it, maibé rai ida-ne’e povu nian dura nafatin”.
Nia hatete, polítika bele iha diferénsia maibé ba interese nasionál timoroan hotu liuliu lider sira tenke hamutuk hodi dezenvolve Timor-Leste, liuliu Timor-Leste bele iha aeroportu ida ne’ebé furak no modernu hodi atrai ema seluk vizita Timor-Leste.(*)
2,220 total views, 6 views today
Bele hare Video Seluk :
Subscribe to Timorpost
