DILI (timorpost.com) — Parlamentu Nasionál (PN), liuhosi Bankada Partidu Demokrátiku (PD) preokupa ho projetu Pelican Paradise ne’ebé mak tinan 13 ona, maibé hela de’it ho promesa.
Prezidente Bankada PD, Deputadu António da Conceição ‘Kalohan’, dehan, hakarak fó hanoin ba governu liuhosi Ministériu Planeamentu Investimentu Estratéjiku (MPIE), atu haree didi’ak to’ok projetu Pelican Paradise ne’e.
“Projetu pelican paradise ne’e hahú kedas iha Kuartu Governu Konstitusionál to’o mai ohin loron maizumenus tinan 13 resin ona, maibé mak projetu ida ne’e ita hela de’it ona ho promesa, tanba projetu lala’o”, António da Conceição ‘Kalohan’, iha Plenária Parlamentu Nasionál, Tersa (03/10).
Tanba ne’e tuir nia governu liuhosi ministériu Ministériu Planeamentu Investimentu Estratéjiku, tenke haree duni ho seriedade ba investimentu ida ne’e, tanba ida ne’e investimentu ida ne’ebé ko’alia Otél, tama to’o iha PERTAMINA no mós loke eskola internasionál mak ida pelican paradise ne’e”, deklara.
Iha altura ne’ebá Ministru Koordenadór altura mak Estanislao, nia parte hanesan ministru komérsiu iha momentu ne’ebá depois ba fali Ministru Edukasaun, tanba ne’e nia hatene projetu ida Pelican Paradise ne’e kleur ona, maibé laiha rezultadu.
“Ha’u hanoin tempu ona ita atu reavalia mós projetu sira ne’ebé mak pratikamente mai ho promesa okupasaun iha terrenu, maibé laiha atividade konkretu, poor liután mak projetu Pelican Paradise ne’e taka tan dalan hosi Tibar nian tama mai Dili, inklui dalan hosi Tasi-Tolu ba ne’e mós taka hotu”, Kalohan deklara.
Entaun sira halo tiha fali propriedade ne’ebá ne’e hanesan tiha sira nian, entaun kestaun ida ne’e la’ós ona segredu ida atu taka ba ema hotu-hotu, liu-liu projetu ida ne’ebé mak liu tinan 13 ona, maibé laiha rezultadu ida iha terrenu.
“Entaun ita presiza reavalia se projetu ida ne’e iha kontinuidade ka lae, tanba Timor rai mak ne’e ona se lae mak ita sa’e tan ba iha foho-foho sira ne’ebá de’it, tanba ida ne’e mak ita presiza reavalia ba iha projetu Pelican Paradise ida ne’e”, nia esplika.
Kuandu sira iha seriedade bainhira mak atu hahú hotel ida dehan multifunsaun ne’e, sera ke Timor-Leste mós atu tama iha Asian 2025, tanba ne’e mak preokupa tebes ho projetu ida ne’e, no presiza tebes duni hodi reavalia fali ida ne’e.
“Tanba ne’e Vise Ministru Asuntu Parlamentár pasa informasaun ba iha Ministru Planeamentu Investimentu Estratéjiku, nune’e ita bele iha orsamentu sira ne’ebé mak atu mai ita bele ko’alia no ita mós bele hanoin kona-ba problema sira ne’ebé ita hasoru kestaun empregu ninian”, nia hakotu.
2,558 total views, 3 views today
Bele hare Video Seluk :
Subscribe to Timorpost
