DILI timorpost.com)—Primeiru-Ministru Cambodia Hun Manet promete sei kontinua fó bolsu estudu ba estudante timoroan ne’ebé iha prestasaun di’ak maibé, laiha kbi’it atu kontinua sira nia estudu ba iha nivel Universitáriu.
Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Dato Sri Francisco Kalbuadi Lay, hato’o informasaun hirak ne’e hafoin nia prezensa iha kapitál Phnom Penh, tanba hetan konvite husi Primeiru-Ministru, Hun Manet ne’ebé assume kargu ne’e dezde iha loron 01 Agostu 2023.
“Ha’u simu konvite husi Hun Manet ne’ebé foin eleitu nu’udar Primeiru Ministru Cambodia nian. Oportunidade ne’e ha’u hasoru ona Ministru Turizmu inklui Ministra Komérsiu, no ha’u mós hasoru malu ho Primeiru Ministru, Hun Manet no ami ko’alia buat lubuk ida, hateten Vise Primeiru-Ministru, Francisco Kalbuadi Lai, liuhosi komunikadu ne’ebé Timor Post asesu iha Tersa (29/08).
Vise Primeiru-Ministru ne’e esplika, husi sorumutu hirak ne’e nia konvida governante sira husi governasaun Hun Manet atu bele vizita Timor-Leste hodi esplora potensialidade iha área ekonomia, komérsiu, negósiu no indústria nian.
“Governante hirak ne’e konkorda ona balun sei vizita ita nia-rain ho sira nia setór privadu sira atu bele esplora ita nia potensialidade sira molok estabelese akordu bilateral ruma iha área ekonomia no negósiu,” nia esplika.
Iha parte sorumutu ho Primeiru-Ministru, Hun Manet, esplika, governu foun Cambodia sei kontinua nafatin tulun Timor-Leste iha área oin-oin to’o Timor-Leste sai full member ba ASEAN.
“Primeiru-Ministru Cambodia mós hatete ona sei kontinua fó bolsu estudu ba timoroan sira atu mai kontinua sira nia estudu iha nivel superior iha ne’e,” nia esplika.
Relasaun bilateral entre rai-rua ne’e komesa metin ba daudauk ona, tanba iha lideransa Cambodia nian iha ASEAN mak halo Timor-Leste sai observadór permanente iha organizasaun rejionál ne’e, no oras ne’e kontinua apoiu Timor-Leste iha setór oin-oin to’o sai full member.
Durante pandemia Covid-19 nasaun barak iha mundu inklui nasaun membru ASEAN sira hetan sofrimentu maka’as kona-ba ekonomia tun, maibé Cambodia konsege hakat-liu situasaun ne’e ho di’ak, tanba hafoin pandemia Covid-19 nasaun ne’e hetan rendimentu maka’as iha setór turizmu.
“Hafoin pandemia Covid-19, turista sira ne’ebé vizita Cambodia kada tinan kuaze millaun 13. Ida ne’e mak ita tenke aproveita inklui mós ita tenke kria solidariedade, fiar no konfiansa ne’ebé kria kleur ona, hahu eis Primeiru Ministru Hun Sen ho maun boot Primeiru-Ministru, Kay Rala Xanana Gusmão koñese malu iha tinan 2002 too ohin loron, ha’u mai atu kontinua de’it, tanba ohin loron nia oan mak sai Primeiru Ministru hanesan mós ha’u nia kolega rasik. Ha’u mós hanesan konvidadu dahuluk mai vizita Cambodia hafoin simu kna’ar foun ne’e,” nia esplika.
Embaixadór Timor-Leste ba Cambodia, Hermenegildo Kupa hatete, prezensa Vise Primeiru-Ministru, Ministru Koordenadór ba Assuntu Ekonómiku, Ministru Turizmu no Ambiente, Dato Sri Francisco Kalbuadi Lay iha Phnom Penh ne’e pozitivu tebes, tanba Vise PM ne’e iha relasaun di’ak tebes ho Primeiru-Ministru foun Cambodia nian, no mós koñese di’ak rai ne’e kleur tiha ona.
“Pozitivu ida mak Cambodia kontinua fó tan bolsu estudu ba ita nia estudante timoroan sira atu mai eskola iha ne’e,” esplika embaixadór Kupa.
Nia hatutan, antes ne’e iha ona estudante timoroan hamutuk nain-10 ne’ebé durante ne’e eskola iha Cambodia no besik atu remata.
1,566 total views, 3 views today
Bele hare Video Seluk :
Subscribe to Timorpost
