OEKUSI (timorpost.com) – Iha loron 06 fulan Jullu 2023, Sekretariadu Tékniku Administrasaun Eleitorál (STAE) Rejiaun Administrativa Espesiál Oe-cusse Ambeno (RAEOA), hahú halo ona Resenseamentu Eleitorál no Atualizasaun Baze de Dadus (REABD) inklui atualizasaun baze de dadus iha Oé-Cusse.
Ofisial IT STAE-RAEOA, Gregorio Inácio do Santos Neno, hatete, STAE-RAEOA hahú loke ona resenseamentu foun ba eleitór sira ne’ebé mak ho idade 16 ba leten no halo mudansa ba suku, aldeia, data moris, no sira ne’ebé mak kartaun lakon.
“Tuir ami nia atividade programa husi nasionál ami hala’o ona REABD ba resenseamentu eleitór foun ne’ebé mak halo atualizasaun ne’ebé komesa husi loron 6 Juñu ate agora sei la’o hela nune’e mós ita halo atendimentu loron-loron,” informasaun ne’e haktuir hosi Gregorio iha nia knaar fatin Oekusi, ne’ebé Timor Post asesu iha pájina RCAL, Segunda (10/07).
Gregorio hatete nia parte husu ba komunidade sira iha suku 18 liuliu ba sira ne’ebé mak idade 16 ba leten, no mós sira mak eleitorál lakon ka aat tenke hakbesik ba iha edifísiu STAE-RAEOA atu bele renova ka halo foun.
“STAE-RAEOA halo resenseamentu hahú husi loron 6 fulan Jullu tinan ne’e to’o agora ami foin rejistu ema na’in-30 resin,” nia hateten.
Entretantu, rekizitu ba resenseamentu ba eleitór foun ne’e presiza foti deklarasaun husi xefe suku, sertidaun Nasimentu, nune’e mós ba atualiza dadus hanesan kartaun lakon tenke foti deklarasaun husi xefe suku no deklarasaun husi polisia no sertidaun nasimentu RDTL inklui sira ne’ebé mak halo mudansa hela fatin mós hanesan hasai deklarasaun husi xefe suku no lori sertidaun Nasimentu.
Tuir dadus ne’ebé maka RCAL asesu katak, eleitór ne’ebé mak tuir eleisaun parlamentár tinan ne’e hamutuk 54.291, kompostu husi feto 27.681 no mane hamutuk 26.610.
3,873 total views, 6 views today
Bele hare Video Seluk :