DILI (timorpost.com) –Sekretáriu Jerál Partidu Kongresu Nasionál Rekonstrusaun Timorense (CNRT sigla portugés), Franscisco Kalbuady Lay, reuniaun ho delegasaun husi Association of Southeast Asian Nations (ASEAN).
Reuniaun ne’e realiza iha Sesta (19/05/2023), hahú tuku 11:00, iha sede partidu CNRT, bairru dos grilhos, Dili.
“Ohin ha’u simu señor Tarindo, husi organizasaun ba ASEAN free election network, sira ne’ebé mai sai hanesan observador ba eleisaun parlamentár, durante semana ida iha ne’e, sira na’in-lima reprezenta ASEAN tomak”, Kalbuady informa ba jornalista sira.
Nia dehan, delegasaun ne’e mós asiste komísiu ikus husi partidu CNRT nian iha Tasi-tolu, ne’ebé sira apresia tebetebes.
“Ha’u hato’o ita-nia apresiasaun, no mós agradese katak ASEAN mós haruka duni sira-nia reprezentante mai iha Timor, atu sai hanesan observadór, hodi observa hela ita-nia lala’ok eleisaun iha ne’e”, Kalbuady afirma.
Nia hatutan, “Sira sente kontente no sira mós haree dehan hahú ohin to’o aban hanesan hari tenang, mais espera iha dia 21 Maiu, bele iha eleisaun ida ne’ebé justu no mós onestu”, Kalbuady trazmite.
Iha biban ne’e, nia apela ba timoroan tomak, katak festa demokrasia ne’e ba ema hotu, na’in mak povu, hotu-hotu hein de’it husik povu deside ba, saida mak akontese iha dia 21 Maiu, partidu ne’ebé sira fó fi’ar, respeitu ba iha desizaun povu nian.
Tanba ne’e husu ba na’i maromak no matebian sira para bele tulun nafatin, atu nune’e eleisaun ida ne’e bele la’o ho di’ak no hothotu bele simu rezultadu di’ak.
Alende ne’e nia husu mós ba militante, simpatizante no apoiante sira hothotu, atu hakmatek iha ida-idak nia fatin, matan moris no neon na’in nafatin liuliu fiskais sira, atu partisipa ho didi’ak iha sentru votasaun.
1,227 total views, 3 views today
Bele hare Video Seluk :