DILI (timorpost.com) – Líder Karizmátiku, Kay Rala Xanana Gusmão, sente triste bainhira rona falesimentu Shirley Shackleton, ne’ebé sempre hadomi no suporta Timor-Leste nia independensia.
“Iha momentu lutu ne’e, Xanana tatoli domin no suporta ba Evan (Shirley no Greg) nia oan, hodi hada’et ba nia família no belun sira”, informasaun ne’e hatete hosi lider Karizmátiku, Kay Rala Xanana Gusmão, Timor Post asesu iha media públiku, Segunda (16/01).
Tuir Xanana, Shirley dedika nia moris tomak, atu luta ba lia los kona-ba nia laen jornalista Greg Shackleton, ne’ebé mate hamutuk ho nia kolega Australianu sira, Gary Cunningham, Tony Stewart, Malcolm Rennie no Brian Peters iha Balibo, loron 15 fulan Outubru tinan 1975.
Xanana hatete, Shirley ajuda relata lia-los trájiku katak, jornalista ne’ebé koñesidu ho “Balibó V” oho husi militár Indonézia no matebian nunka ta’uk atu negosia ho Governu, hodi kontesta militár Indonézia.
Lider Nasionál ne’e rekorda katak, Shirley lidera kampaña hodi divulga sofrimentu husi timor-oan sira, durante tinan 24 nia laran no depois independénsia dala-barak mai Timor-Leste no simu nia hanesan família.
Ba Xanana, matebian inspira timor-oan husi ninia determinasaun no nunka tauk atu buka lia-los, ho ninia karizma ne’ebé extra-ordináriu hodi luta bá justisa Balibo V no mós ba povu Timor-Leste, nune’e nia merese duni atu distingi ba nia, medalla Ordem de Timor-Leste.
Entretantu, Shirley mós apoia estabelesimentu Balibo House Trust durante governasaun ne’ebé lidera husi Primeiru Ministru Australia Steve Bracks no nomeiada sai membru board instituisaun ne’e, hodi omenajeia Balibo five (V), no apoia komunidade Balibo, Munisípiu Bobonaro.
Ligadu husi matebian mak restaurasaun bandeira Australiana iha Balibo (fatin akontesimentu Balibo five, hari’i Sentru Estudu Komunitáriu, sala ba prosesu aprendizajen, ekipamentu iha eskola 4, kria Klínika Nehan iha Balibo, Hotel iha Forte Balibo no kria foin lalais ne’e, muzeum veteranu iha Forte Balibo.
1,778 total views, 3 views today
