Itália (Timor Post) – Líder Karizmátiku, Kay Rala Xanana Gusmão, hasoru malu ho Líder boot igreja katólika iha mundu, Papa Francisco iha Vatikanu.
Informasaun ne’e Timor Post Online, asesu hosi pájina ofisiál Facebook, Prezidente Repúblika, José Ramos Horta, Sesta (26/08).
Iha hasoru Malu ne’e, Líder Nasionál ne’e mós entrega prezente Uma-adat hanesan identidade kulturál Timor nian ba Papa Francisco.
Portante prezenzsa Eis Prezidente Repúblika, Xanana Gusmão, iha Roma Itália, enviadu espesiál hosi Prezidente Repúblika, hodi reprezenta Estadu Timor-Leste ba partisipa investidura Arsebispu Dom Virgílio do Carmo da Silva ba Cardeál hamutuk sira hosi nasaun Sira seluk.
Dom Virgílio sei simu investidura hosi Papa Francisco sai Kardeál dahuluk iha Timor-Leste iha loron 27 fulan Agostu, nu’udar prezente furak ida hosi Papa Francisco, hodi fó orgullu povu Timor-Leste, ne’ebé maioria nu’udar sarani Katólika iha rejiaun ASEAN.
Bispu Dom Virgílio, sei hela hamutuk ho bispu na’in-2 seluk, kompostu husi kandidatu kardeál foun na’in-8 hosi Europa, neen (6) hosi Ázia, rua (2) hosi Áfrika, ida (1) hosi Amérika Norte, haat (4) hosi Amérika Sentrál no Latina Amérika nian sei hela hamutuk hodi prepara hamutuk serimónia kriasaun ba sai kardeál foun hosi Amu Papa Francisco, iha Bazílika São Pedro Vatikanu.
4,026 total views, 12 views today
