DILI—Maioria deputadu sira husi bankada parlamentar ualu iha Parlamentu Nasionál defende estadu defende aplika estadu emerjénsia hodi antisipa daet husi virus corona (COVID-19), maibé estadu liuliu governu tenke mobiliza apoiu umanitária ba populasaun sira iha uma kain ida-idak.
Deputadu no Prezidente Partidu Demokrátiku (PD), Mariano Assanami Sabino afirma, defende kestaun ne’e tanba impaktu husi virus corona ba situasaun sosial no ekonomia maka’as tebes, kompania privadu sira barak maka hapara ona traballador sira iha uma, atividade negosiante sira paradu ke bele provoka situasaun hamlaha iha família ida-idak. Nune’e, tenke iha apoiu umanitária.
Hatan ba preokupasaun ida ne’e, Primeiru Ministru Taur Matan Ruak konkorda tebes kona-ba governu nia responsabilidade ba apoiu umanitária, maibé governu sei prepara fali oinsá mak iha medida sira kona-ba assuntu ne’e. no liuliu ba impaktu ekonomia nian.
“Klaru ke se ita aplika estadu emerjénsia maibé ita husik populasaun hamlaha ne’e irasional uitoan. Konserteja governu tenke organiza para hahan labele falta ba ita nia sidadaun sira,” Taur hatete iha nia intervensaun iha loron Kinta (26/03/2020), iha plenária extraordinária debate ba autorizasaun ba deklarasaun estadu emerjénsia husi Prezidente Repúblika.
Taur dehan, governu sei estabelese gabinete ida kona-ba jestaun krize sei lidera husi primeiru ministru rasik. Tanba ne’e, nia dehan, governu sei prepara fali medida ida ne’e hodi aprejenta ba parlamentu nasionál.
Taur mós konkorda ho deputadu sira kona-ba impaktu ekonomia liuliu iha kompania privadu sira.
“Kona-ba impaktu ekonómika ami sei aprejenta fali, para liuliu ita iha planu integradu ida prevé kedas ba fulan tolu nian, fazeadu ho akordu. Ita tenta responde de melhor forma,” Taur subliña.
Tuir konstituisaun estadu emerjénsia sei aplika durasaun fulan ida, hafoin ne’e mak iha avaliasaun haree husi risku sira bele kontinua ka hapara ona. (cao)
653 total views, 3 views today
Bele hare Video Seluk :
Subscribe to Timorpost
