DILI (timorpost.com) — Komemorasaun loron Masakre Santa Kruz, 12 Novembru ba da-31, Prezidente Repúblika (PR), José Ramos Horta, hatete ba oin Timor-Leste (TL) atu halo mak ema hotu-hotu tenke simu malu la’ós atu halo diskriminasaun entre grupu ho grupu seluk.
Nia hatete, ba oin hotu-hotu tenke kontinuasaun primeiru harii nasaun ida ho pasífiku, nasaun ida ne’ebé moris iha dame no domin nia laran, tenke harii nasaun ida ne’ebé moris iha demokrasia, iha multi-partidarismu, iha Liberdade Imprensa, Liberdade Relijioza, laiha diskriminasaun ba gurpu.
“Relijiaun sira hotu-hotu tenke kontinua simu malu kolabora hanesan Timor-Leste ohin daudaun ne’e. Ita dere ba vítima sira ne’ebé iha Santa Kruz, ba vitima sira hotu-hotu no eroi sira mak ida ne’e, kontinua prosesu harii nasaun ida ne’ebé livre no Demokrátiku bazeia ba direitu, kria Justisa, inkluindu Justisa Ekonómia no Injustisa Sosiál,” nia diskursu iha seremónia loron Masakre Santa Kruz, iha Semitériu Santa Kruz, Balide, Sábadu (12/11).
Nune’e nia dehan, hanesan hotu-hotu hatene, Parlamentu rona, Governu rona, Prezidente Repúblika rona, ne’e buka atu halo buat ne’ebé lideransa polítika ne’ebé eleitu hodi povu, para haree buat ne’ebé bele halo iha Konstituisaun nia laran.
“Atu halo desizaun nasionál, la’ós de’it Governu, Deputadu ou Deputada sira ho Prezidente, maibé buat hotu-hotu liuhusi Tribunál Rekursu, kuandu iha duvida ruma haree ba lei ne’e tuir duni espíritu Konstituisaun no tuir espíritu letra hanesan ita bolu equidade, tenke la bele iha grupu ida ne’ebé benefisiu liu grupu seluk,” Xefe Estadu relata.
Nia hatutan, liuhusi prosesu ne’e hotu, povu mós partisipa, partisipa ne’e oinsá, liuhusi sosiedade sivíl, liuhusi média no hanesan foin daudauk alin sira halo iha besik Parlamentu Nasionál oin ne’ebá.
Portantu imi-nia mensajen, mensajen Igreja nian ko’alia kona-ba ida ne’e, Amu Papa ko’alia mós ba ida ne’e, ne’ebé Justisa sosiál iha mundu.
“Ita buka moris nafatin iha dame nia laran, ha’u husu no apelu ba joven sira, ita hotu-hotu tinan ida ne’e ita lakon, tinan ida ne’e la fila, tan ne’e ita buka estuda, estuda no estuda, maski iha difikuldade oin-oin hanesan eletrisidade laiha, hahán laiha, bee moos laiha karik, estuda nafatin estuda liután,” PR realsa.
Alende ne’e mós Xefe Estadu, afirma tan kona-ba Edukasaun nian, Timoroan barak no joven barak iha tinan 20 nia laran ne’e hetan ona estudu hanesan ne’ebé eroi sira uluk la hetan, laiha Timoroan ida iha jerasaun 1975 ne’ebé hetan estudu hanesan joven lubuk ida ohin hetan.
“Ne’ebé halo mestradu iha Universidade Oi-oin iha ita-nia rai laran, mestradu dutoradu iha mundu, balu sai sientista joven Timoroan ida manaan Konkursu Internasionál 4° lugár ba iha Matemátika, ne’ebé hetan partisipante husi mundu ne’e rihun 5 ho universidade lubuk ida, ne’e signifika ita hotu-hotu ita iha kakutak, ba fó hakaas kakutak ne’e, maibé balu lae,” nia preokupa.
Antes atu hakotu nia husik hela mensajen ba joven sira katak, futuru ne’e iha duni imi nia liman, joven sira iha Santa Kruz entrega ba jerasaun 75, hodi kontinua entrega ba imi no imi mak futuru nasaun nian, ne’e duni moris iha dame, para imi bele estuda iha dame nia laran ou estuda ho seguru.
2,186 total views, 3 views today
Bele hare Video Seluk :
Subscribe to Timorpost
