DILI (Timor Post)- Komisaun Anti Korrupasaun (KAK), Sei halo opersaun ba Karreta Estadu ne’ebé kargu xefia balun kontinua uza lori ba sira-nia uma.
Informasaun ne’e, hatoo husi Diretór Jerál Investigasaun KAK, José de Araújo Verdial, ba Media Online Timor Post iha nia knaar fatin, Segunda (25/07).
“KAK rasik iha ona planu propriu atu halo operasaun ba Karreta Estadu sira ne’ebé funsionáriu ka kargu xefia sira lina Ministerál balun kontinua nafatin uza no lori ba uma, tanba informasaun husi Públiku kestiona katak, maski iha ona subsidiu transporte ho osan montante 50 USD to’o 150 USD,” nia dehan.
Nia dehan, Governu liuhusi Ministériu Finansas iha loron Sesta (14/01) aprova ona despaxu númeru 03/VI/GM-FM/2022-01, hodi bandu entidade sira liuliu kargu xefia iha lina Ministerál no instituisaun Estadu atu la lori karreta Estadu ba para iha uma.
“Agora, komum sei iha hela faze foin hahú halo implementasaun, maibé ami tau iha ona planu para halo rasik operasaun ba veikulu estadu sira ne’ebé funsionáriu balun kontinua lori ba para iha sira rezidénsia,” nia dehan.
Nia afirma, KAK halo operasaun ne’e, tanba Diretores ka Kargu Xefia balu sei kontinua utiliza kareta Estadu ba Uma, nune’e mós haruka Motorista sira ba tula sira iha Uma.
“Kuandu ami halo operasaun ba ida ne’e, ami hetan tenke kontinua nia prosesu, maibé kuandu ita hetan ida ne’e, Lei fó dalan ba KAK katak ida ne’e fragante de lito, katak haree ema ne’e halo daudaun krime ida, ita tenke detein ema ne’e oras 72,” nia hateten.
Tuir nia, banhira sira hetan karreta estadu mak entidade balun kontinua lori ba uma, entaun sira prende karreta ka evidénsia ne’e, nune’e mós ema ida lori karreta tenke kompre dever 72 oras, hafoin haruka ba iha Ministériu Públiku, depois lori ba iha Tribunál, hafoin tribunal mak diside.
“Internus adminstrativamente ne’e, parte ba iha Ministériu ida-idak ho nia Patrimóniu Estadu mak hodi haree, maibé intermus krime nian kona-ba iha pekulatu uzo ne’e, kabe ba ami KAK nia Kompeténsia, hodi nune’e para tenke halo atuasaun.
“Maibé, kona-ba utilizasaun Karreta Estadu nian ne’e, ha’u hanoin katak, la’ós de’it servisu KAK nian deit, maibé Gabinete Inspesaun e Auditoria iha kada Ministériu nia serbisu mós, ne’ebé hala’o knar nu’udar órgão kontrolu iha Interna Ministériu,” nia esplika.
1,557 total views, 15 views today
