DILI (Timor Post) – Deputadu hosi Bankada Frente Revolusionáriu Timor Leste Indepedente (FRETILIN), Fabião de Oliveira, hatete Timor-Leste presiza iha Seguransa Rigorozu ba Tráfiku Droga.
Nia hatete, tanba jerasaun foun Timoroan konsumu ona droga, nune’e motiva sira atu labele konsumu tanba ne’e bele destroi sira-nia vida.
“Ita hatene Timor-Leste sai hanesan rejiaun ne’ebé kona-ba trafiku droga nian, nune’e ita tenke iha seguransa rigorojidade, liuhosi fronteira sira, hanesan aéro, marítima, no terestre,” Nia hateten iha Parlamentu Nasionál, Kinta (18/08).
Nia dehan, hanesan jerasaun foun labele konsumu droga, tanba bele estraga vida iha futuru, nune’e hanessan membru parlamentar husu ba joven sira atu para konsumu veneno ida ne’e.
“Husik na autoridade seguransa sira atu rigorozu ba kestaun droga ida ne’e, nune’e ba joven sira nu’udar jerasaun foun, Timoroan sira, kuidadu aan labele mete iha kazu sira ba droga, tanba ne’e ladi’ak ba futuru vida joven nian,” nia sublina.
Liga ba Desizaun Tribunál Distritál Díli (TDD), nian nia labele halo intervensaun ba justisa tanba sira mak iha kompeténsia tomak hodi haree ba ida ne’e.
“Karik desizaun Tribunál foti lei hanaran Termu Identidade Rezidénsia (TIR), foti Aprezentasaun Períodika (AP), prizaun preventiva (PP), ita tuir de’it,” nia afirma.
Nia hatutan, maski públiku estranu no hakfodak ba desizaun Tribunál nian, Nune’e Tribunál mós tenke iha konsiderasaun, maibé Tribunál mós fó konfiansa tanba nia indepedente, entaun nia rezolve problema tuir lei ne’ebé vigora iha Timor Leste
Nia dehan, iha Ministériu Públiku, atu hatama rekursu ba Tribunál, tanba lamenta ho lei ne’ebé akontese, ne’e direitu para submete fila-fali rekursu ba orgaun judisial ne’ebé aas, atu bele husu fiskalizasaun abstrata.
Nia afirma, halo ida ne’e atu haree fila fali kazu ne’ebé daudaun Tribunál foti ba arguidu nain-9 ho lei ida naran TIR, tanba haree kazu ne’e deskonfia mak barak, maibé presiza iha investigasaun profunda ba kazu refere.
“Kazu hanesan konsumu droga ida ne’e mak ita deskonfia de’it nunka fó solusaun ba problema refere, maibé ivestiga aprofundadu, ba kazu refere, signifika sei iha solusaun dignu ba kazu ne’ebé akontese iha Timor Leste,” nia hatutan.
Ikus nia dehan, hanesan deputadu ne’ebé reprezenta povu hosi bankada FRETILIN, husu ba joven nu’udar jerasaun foun sira hotu labele konsumu droga, tanba bele estraga futuru, tanba futuru importante ba Timor Leste.
3,232 total views, 3 views today
Bele hare Video Seluk :
Subscribe to Timorpost
