DILI (Timor Post) – Ekipa Komunikasaun Korporativa Husi Samsung, Sesta (19/08), hasoru Primeiru Ministru, Taur Matan Ruak, hodi ko’alia kona-ba fó formasaun ba joven sira iha Timor-Leste.
“Ohin ami husi Samsung Eletrónika mai hasoru Primeiru Ministru, ko’alia kona-ba parte Korporativa servisu ninian,” dehan Prezidente Ekipa Komunikasaun Korporativa Samsung, In-Yong Rhee, iha Faról.
Iha soru-mutu ne’e, sira esplika ba Primeiru-Ministru, kona-ba saida mak sira atu halo liuliu relasiona ho programa Korporativa Sosiál Responsabilidade ninian.
“Ami ko’alia ho Primeiru Ministru, oinsá atu ajuda joven iha Timor-Leste sira hodi dezenvolve sira liuliu kona-ba skill ninian, hodi bele lori sira rezolve problema ne’ebé baibain nasaun enfrenta,” dehan nia.
Nia reforsa, la’ós ida ne’e de’it maibé sira mós sei fó formasaun ba joven sira hotu iba Timor-Leste ba área oi-oin, hodi bele aumenta sira-nia kapasidade.
“Primeiru Ministru simu ideia ne’ebé ami atu halo ne’e, nune’e iha futuru espera ami bele servisu hamutuk hodi bele halo buat ruma atu apoiu joven sira iha Timor-Leste,” deklara nia.
Programa ne’e mak naran solve for tomorrow ka rezolve ba aban ninian, tanba ida ne’e sei hanorin sira no fó akompañamentu ba sira oinsá sira bele rezolve problema ne’ebé rai ida ne’e enfrenta.
“Ami mós mai fó agradesimentu ba Primeiru Ministru, tanba Governu Timor-Leste nia apoiu ba Korea atu organiza Expo-Busan 20-30 ninian,” nia hakotu.
2,102 total views, 3 views today
Bele hare Video Seluk :
Subscribe to Timorpost
