DILI, (timorpost.com)—Prezidente Repúblika (PR), Jose Ramos-Horta, Kinta (23/05) simu karta kredénsial hosi Embaixadór foun Estraordináriu no Plenipotensiáriu Repúblika Angola Jose Andrade de Lemos.
Serimónia ne’e hala’o iha Palásiu Prezidente Nicolau Lobato Bairu-Pite.
Embaixadór José Andrade de Lemos nu’udar diplomata Angolanu ida ne’ebé susesu ho karreira ne’ebé hala’o durante tinan tolu-nolu nia laran.
Nia servisu nu’udar konselleiru iha Gabinete Sekretáriu Estadu Negósius Estranjeiru (SENE) no Embaixadór Angola nian ba Emiradus Arabes Unidus, Arabia Saudita, Kuwait, Qatar no Bahrain.
Timor-Leste no Angola iha ligasaun istórika ida-ne’ebé kle’an iha sira-nia luta ba libertasaun nasionál.
Nasaun rua ne’e iha kompromisu atu hametin sira-nia relasaun bilaterál amigável iha ámbitu Komunidade Pais Lian Portugés (CPLP- sigla português).
Timor-Leste rekoñese potensialidade Angola nian iha setór mina-rai no gás, hodi hatudu interese iha parseria diplomátika, ho Angola sei sai hanesan nasaun primeiru husi nasaun Afrika ne’ebé ko’alia lian portugés hodi loke embaixada iha Timor-Leste, hodi kontinua relasaun diplomátika.
Kooperasaun entre nasaun rua ne’e mós haluan ba asuntu rejionál sira, inklui disputa marítima iha Tasi Xina Súl, iha ne’ebé Timor-Leste apoiu rezolusaun pasífika liuhosi diplomasia. Nasaun rua apoiu malu iha esforsu multilateral sira inklui esforsu Timor-Leste nia integrasaun ba ASEAN no pozisaun Angola nian iha Sahara Osidentál.
Hafoin simu tiha karta kredénsia ne’e, prezidente Jose Ramos-Horta hato’o nia konfiansa katak Embaixadór José Andrade de Lemos sei hasa’e no hametin ligasaun amizade no kooperasaun entre Timor-Leste no Angola.
1,032 total views, 12 views today
Bele hare Video Seluk :