DILI (TIMORPOST.COM)—Governu liuhosi Sekretáriu Estadu Formasaun Profisionál no Empregu (SEFOPE) sei kria regra foun ida ba traballadór sira antes ba servisu iha Austrália.
“Iha tinan oin ami sei kria regra foun ida ba traballadór feto no mane sira ne’ebé atu servisu iha Austrália, tenke rekolla uluk pasaporte ka kartaun fixa tau iha embaixada hodi nune’e embaixada bele kontrolu traballadór sira servisu hodi labele halai hosi sistema”, Rogério Mendonça, ba Timor Post hafoin hetan apoiu ekipamentu laptop hosi governu Korea iha salaun SEFOPE, Kaikoli, Kuarta (06/12/2023).
Membru governu ne’e relata, fixa ida ne’e objetivu atu limite de’it traballadór sira labele halai hosi kompañia ida ba kompañia seluk, hodi prejudika no taka dalan ba juventude sira seluk atu ba servisu iha nasaun Austrália ho Korea ne’e laiha ona, tanba ne’e mak SEFOPE esforsu servisu hamutuk ho Austrália, Korea Japan hodi kria regra foun.
Hodi nune’e ba futuru labele akontese tan traballadór Timoroan ba servisu iha Austrália Korea, Japan labele halo tuir sira nia hakarak hodi halai hosi sistema ikus mai nasaun tolu bele blokeiu no la fó oportunidade ba Timor oan ba servisu iha ema nia rain.
Governante ne’e konta, traballadór labele ba servisu fali iha kompañia seluk, tanba sira nia karta fixa rekolla hatama iha embaixada sira labele ba kontinua fali servisu iha fatin seluk, tanba karta fixa ne’e mensiona iha laran labele servisu iha kompañia seluk.
Enkuantu Traballadór sira ne’ebé halai hosi sistema ne’e, tanba covid-19 sira nia kontratu hotu ona, maibé atu fila mai iha Timor aviaun la halai entaun sira foti desizaun halai hosi sistema hodi ba servisu iha kompañia seluk.
Maski traballadór halai hosi sistema, maibé sira la hetan diskriminasaun hosi governu Austrália, tanba daudaun ne’e traballadór sira di’ak hela laiha intervensaun hosi governu Australia, maibé SEFOPE hanoin ba oin kria regra ida rigorozu hodi kontrolu traballadór sira ne’ebé servisu iha nasaun rua ne’e.
1,254 total views, 6 views today
Bele hare Video Seluk :
Subscribe to Timorpost
