BAUKAU (timorpost.com) – Servisu Munisipal Agrikultura no Peskas (SMAP) Baukau, relata atividade fila rai gratuita ba agrikultór sira nian lao ladún di’ak, tanba maioria trator avaria.
Kestaun ne’e hato’o husi Diretór Servisu Munisípiu Agrikultura no Peskas Baukau, Moises Lobato Perreia, hatete sira labele halo manutensaun boot ba trator ne’ebé hetan avaria total, maibé halo de’it manutensaun kiikoan tanba orsamentu sentralizadu iha nasionál.
Nia esplika, servisu munisipál agrikultór kada tinan sempre hato’o pedidu ba Ministériu Agrikultura iha nasionál hodi husu osan manutensaun ho volume ki’ik no bainhira hetan ona alokasaun mai munisípiu, parte mekaniku SMAP Baukau nian halo manutensaun kiik tuir volume orsamentu.
“Ita-nia trator boot hamutuk 33, maibé la funsiona hamutuk 21 no atu hateten la’ós a’at total, maibé iha elementu balun hanesan sil, roda, rolamentu no tasu, kuandu troka hotu elementu hirak ne’e bele ona hala’o fali atividade fila rai gratuita ba komunidade agrikultura sira-nia natar no toos”, nia hateten ba Timor Post, Sesta (10/03/2023) iha nia knar fatin.
Atual Diretór ne’e afirma, daudaun ne’e iha trator 7 mak nia kondisaun di’ak hala’o serbisu iha area Laga, Vemasse no Baukau vila, enkuantu trator lima seluk tama ona ba iha parte lelaun nian tanba kondisaun a’at total.
“Ita-nia trator hitu mak agora nia kondisaun di’ak, rua iha Vemasse, rua iha suku Seisal, rua iha suku Gariuai no ida iha postu administrativu Laga, maibé neen de’it mak lao di’ak tanba trator rua iha Vemasse, ida bainhira halai hela natar hetan avaria”, dehan Moises.
Trator 34 ne’e iha marka oin tolu, kompostu husi marka Agrindo, Kubota ho Massey Ferguson, entre marka oin tolu ne’e hela de’it mak marka Kubota ho Massey Ferguson enkuantu marka agrindu lima tama ona ba iha lelaun.
Tuir observasaun jornalista nian nota katak trator 21 barak mak feruzin hotu ona tanba tempu tinan barak husik hela iha area nakloke iha ne’ebá udan, anin kona no loron matan habai.
2,439 total views, 6 views today
Bele hare Video Seluk :
Subscribe to Timorpost
