DILI, (timorpost.com)— Prezidente Repúblika (PR), José Ramos-Horta, konfirma ezekusaun Orsamentu Jerál Estadu (OJE) tinan fiskál 2024 ba Primeiru Ministru (PM), Kay Rala Xanana Gusmão, tanba ne’e Xefe Governu hatete membru Governu ne’ebé la ezekuta OJE 2024 ho di’ak to’o iha fulan-Marsu tenke sai.
Xefe Governu haktuir ba jornalista sira iha Palásiu Prezidensiál Nicolau Lobato Bairru-Pité, Tersa, (13/02), katak, Prezidente Repúblika husu kona ba Orsamentu Jerál Estadu (OJE) tanba agora fulan-Fevereiru ona oinsá ezekusaun OJE bele la’o “Ha’u mós dehan katak sei bele la’o tanba Orsamentu ne’ebé boot maibé rezultadu laiha ne’e ha’u ko’a hotu tau fali oituan hodi dehan ba Ministru sira ezekuta tiha, bainhira ezekuta ho di’ak tinan seluk sei fó liután mós bele”.
Primeiru Ministru esplika, tanba hatún orsamentu ne’e la’os fiar ida maibé tanba sistema ida ne’ebé mak muda iha finansas nian, daudauk ne’e diretór sira sai husi sistema ida ba fali sistema ida simples, tanba ne’e komplikadu oituan.
“Ha’u dehan ba Prezidente Repúblika bele fiar katak ami sei ezekuta di’ak tanba Marsu liu ha’u sei la’o, dehan tiha ona katak orsamentu pur programa, tau tia programa mak foin tau osan ba iha programa, tanba ne’e ha’u sei la’o, maibé haree mak la ezekuta iha programa sira ne’e entaun Ministru sira ne’e tenke sai”, PM garante.
La’os ba Ministru sira de’it maibé mós ba diretór sira tanba osan ne’e povu nian tenke zere ho di’ak.
Aleinde ne’e, Xefe Governu mós informa katak agora hahú daudauk ona halo auditoria husi munisípiu Lautem too Oekusi, auditoria ba fatin hotuhotu tanba susar tebes.
“Ami haree fali ba iha Konta Jerál do Estadu iha tinan hirak ne’e, ha’u temi de’it ida PNDS iha 2022 USD 68 Miloens, dehan gasta 38, tanba ne’e ami buka tuir gasta ba saida maibé la hetan, ita bele dehan katak ne’e iha hela banku”, Xefe Governu ne’e kestiona.
Tanba ne’e mak ministru ida ne’ebé mak servisu ba Organizasaun Nasoens Unidas (ONU) ninian fó ona ezemplu mai ita katak ONU ne’e gasta osan mak barak, haree de’it G7+ ba iha fatin barak, ezemplu di’ak ida mak Repúblika Afrikana besik tinan 30 ona tiru malu nafatin maibé ONU tuir iha fatin de’it mak simu osan.(*)
2,574 total views, 3 views today
Bele hare Video Seluk :
Subscribe to Timorpost
