ERMERA (timorpost.com) – Prezidente Partidu CNRT, Xanana Gusmão agradese membru FRETILIN sira komesa hanoin no akompaña situasaun Timor-Leste la’o oinsá, tanba alisersa estadu nian airin haat nakadoko, tanba sistema sobu arbiru, halo estadu sai fraku liután.
“Imi maka hatudu no imi bele haree, imi maka hatudu imi bele deside. Ha’u kontente, se imi bele haree saida maka akontese iha ita nia rain, no atu lembra katak, ita presiza hamutuk hodi hadia rai ne’e,” nia hatene hafoin simu militante 500 liu iha Munisípiu Ermera.
Xanana dehan, nia respeita partidu FRETILIN, ema hirak ne’ebé deklara afilia ba CNRT la’òs hanoin atu sobu FRETILIN, maibé povu no afiliante sira konsiente katak, partidu ida ne’ebé merese ba sira atu hili hodi hadia futuru nasaun.
“Ha’u kontente tanba imi mai la’ós atu sobu partidu seluk, tanba iha 1999 povu rasik haree bandeira merah putih hari tomak iha Timor, too votasaun, sira ba vota ukun aan. Ida ne’e hatudu katak, povu matenek duni, atu haree no hili tuir sira nia konsensia,” Xanana agradese.
Iha parte seluk, Xanana dehan tinan 10 CNRT ukun gasta duni osan billiaun 10-liu halo duni dezenvolvimentu, mezmu ema kritika katak, CNRT la halo buat ida, maibé se kompara ho partidu sira ne’ebé ukun agora gasta milliaun 9, maibé povu la sente buat ida.
“Iha tinan 10 CNRT kaer ukun gasta billaun 10- liu, mais halo buat barak, no buat barak la hotu, mais se kompara ho ida ukun tinan 5 ne’e ita la haree buat ida, sira gasta billaun 9, entaun povu haree no deside tok ida ne’ebé di’ak, tanba bele hatudu iha hanoin naruk dezenvolve rai ne’e, bele la’o neneik, mais povu rasik sente no haree ona. Agora tinan 20, imi haree, imi sukat no tau iha imi nia ulun katak, dalan loos maka ne’e, agradese tebes-tebes imi fó konfiansa ba CNRT,” tenik nia.
Iha CNRT nia inu dehan, rai ida ba povu ida, ne’e duni Xanana pela ba maluk sira iha FRETILIN ne’ebé hamutuk ona ho CRNT, organiza malu dehan ba povu atu hili partidu ida ne’ebé sira haree hetan atu hadia rai Timor.
Fatin hanesan, Vice Prezidente Partidu CNRT, Gil da Costa “Oan Soru” husu ba povu labele tauk atu vota ba CNRT, tanba CNRT hanesan lilin ne’ebé sei leno no fó naroman ba povu no nasaun Timor-Leste nia moris.
Entretantu, Kordenador HAP-CNRT, Samuel Marçal sei kontinua mobiliza ekipa halibur membru grupu partidu politikus atu la’o hamutuk ho CNRT.
Samuel dehan, rai ida ne’e ejize atu ema hotu- hotu hamutuk hodi apoia CNRT Lori Xanana hodi hadia rai ne’e ba oin.
Nia dehan, ohin loron lider partidu politiku barak loron kalen, sesta bazika, osan 200 USD hodi fahe ba povu, ida ne’e nu’udar hahalok ida ne’ebe la komprende kultura no tradisaun Timor-Leste.
Entretantu, Vise Sekretáriu Jerál CNRT, Jacinto Rigorberto de Deus garante katak, Munisípiu Ermera sei fó votus rihun 50, hodi garante vitória CNRT, nune’e bele dezenvolve rai ida ne’e.
“Ermera ho votus barak ita halai hamutuk, tinan 20 la vota vota ba CNT, 24 terus iha rai laran, agora ita hamutuk vota ba CNRT, hodi lori rai no povu ida ne’e, husi sofirimentu hodi alkansa objektivu, liberta povu, ho Emera sei fó votus rihun 50,” garante Jacinto Rigoberto.
Entretantu konsolidasaun partidu CNRT hetan partisipasaun masimu hosi populasaun inklui membru FRETILIN sira.
1,427 total views, 3 views today
Bele hare Video Seluk :
Subscribe to Timorpost
