DILI-Daudaun ne’e Autoridade Munisípiu Dili (AMD) tau ona orsamentu ho montante 400.000 USD hodi implementa Programa Mão de Obra Postu Administrativu (PMOPA) iha tinan 2023.
“Tinan ida ne’e ami tau ona orsamentu ho montante 400.000 UDS hodi implementa programa PMOPA ne’e nia durasaun fulan 8 nia laran maibé fahe ba fase dahuluk no daruak tuir etapa”, Prezidente Autoridade Munisípiu Dili, Guilhermina Filomena Ribeiro, hateten ba Timor Post iha nia servisu fatin Matadouru, Kinta (16/03).
Guilhermina hatete nia parte simu ona lista no proposta no programa husi postu administrativu Vera Krús, Na’in Feto, Kristu Rei, no Dom Aleixo mak hatama ona lista no hein de’it atu implementa programa refere iha suku hamutuk 32.
Nia dehan, kada postu administrative ida ho nia orsamentu ba programa PMOPA ne’e ho montante 100.000 USD, maibé fahe ba fase primeiru no fase segundu iha nia atividade hanesan limpeza, hamoos, duut, hamoos baleta kuak, dasa rai iha suku ka aldeia no bairru ida-idak tuir oráriu ne’ebé iha.
Enkuantu, oráriu servisu ba programa refere maka hahú iha loron segunda to’o loron sesta hahú oras servisu limpeza nian iha oras tuku 08:00 to’o oras tuku 05:00 lokraik maka foin fahe malu depois aban maka kontinua fali.
Portantu, programa refere kada suku ida iha ema na’in-20 maka servisu limpeza to’o semana ida troka fali ema seluk, atu nune’e komunidade sira ne’ebé laiha servisu sira bele aproveita servisu liuhusi limpeza ida ne’e hodi hetan osan atu bele sustenta ba vida moris família nian.
Prezidente ne’e konta, servisu refere kada pesoál ida loron ida hetan 5 USD hodi bele sustenta ba nia nesesidade família nian maski tempu badak pelu menus bele responde ba nesesidade uma laran nian.
Iha sorin seluk, administradór postu administrativu Dom Aleixo, Jose de Jesus informa, sira enkontru ona ho MAE iha semana kotuk ko’alia kona ba programa PMOPA iha semana oin sei implementa iha suku ida-idak.
“Ami lori ona naran mai submete ona naran ba iha autoridade munisípiu Dili los ona semana oin ami implementa ona programa PMOPA iha suku 7 no aldeia 71 iha postu administrativu Dom Aleixo”, nia hateten.
Administradór ne’e esplika, programa refere nia durasaun fulan 8 maibé kada suku ida iha ema na’in-20 maka halo servisu maibé iha rotasaun kada suku ida-idak atu nune’e komunidade ne’ebé laiha servisu bele asesu hotu ba servisu ne’e hodi hetan osan atu bele sustenta ba sira nia nesesidade família nian.
Portantu, servisu ba programa PMOPA ne’e hahú servisu iha loron segunda to’o sesta oras tuku 08:30-17:00 servisu iha dadeer to’o lokraik ema ida hetan osan 5 USD hodi bele responde ba nesesidade uma laran. Enkuantu orsamentu aloka ba programa refere iha etapa primeiru no segunda ho montante hamutuk 100.000 USD.
271 total views, 6 views today
