Dili (timorpost.com)—Sekretáriu Estadu Protesaun Sivíl (SEPS), hamutuk ho Programa Alimentár Mundial (WFP-sigla Ingles) no Organizasaun Alimentasaun Agrikultura (FAO) tuir dadus estatístika alerta urjente TL hatudu risku kategoria hamlaha kauza husi El Niño.
“Ida ne’e presiza tau atensaun urjente ho lalais se lae nia impaktu bele lori Timor-Leste tama iha zona risku hamlaha tanba daudauk hasoru El-Niño ho grau temperatura ne’ebé mak sa’e makas hodi fo risku ba manas no risku inséndiu mosu”. Haktuir Sekretáriu Estadu Protesaun Sivíl, Mariano Domingos Reis, ba timor Post iha nia knar fatin Caicoli, Segunda (06/11).
Governante ne’e alerta mós ba komunidade sira atu labele sunu rai no tesi-ai arbiru ho nune’e bele garante ambiente matak no buras atu nune’e nasaun labele mosu mudansa klimátika boot hodi fó ameasa ba nasaun.
Iha sorin seluk, reprezentante WFP iha Timor-Leste, Alba Cecilia Garzon Olivares dehan, TL tama ona iha sinál bailoro naruk bazeia ba indise bailoro konjuntu ne’ebé produs husi governu TL no FAO.
“Konsekuénsia husi El Niño predisaun udan been sei ki’ik too iha inisiu tinan 2024”. Nia haktuir.
Ida ne’e problema sériu tanba afeta ba gravemente ba setór agrikultura rai laran no impaktu mak risku hamlaha.
“Tanba ne’e agora tempu atu halo asaun no mutilasaun ba impaktu El-Niño hodi antesipa risku hamlaha iha tempu bailoro naruk ne’e”.
Nia esplika, antes ne’e akontese ona bailoro naruk ne’ebe kauza husi El-Niño hamosu ona impaktu ba uma kain porsentu 33 ne’ebe kada ema nain tolu husi nain sanulu iha rai laran mak sofre ai-han entre tinan 2015-2016.
Tuir dadus ne’ebé hatudu katak munisípiu sira ne’ebé tama iha kategoria risku hamlaha mak hanesan Vikeke, Likisá no Zona Espesiál Oekusi-Ambenu mak iha nivel risku ne’ebé aas liu.
939 total views, 3 views today
Bele hare Video Seluk :
Subscribe to Timorpost
