Dili (Timor Post) – Padre Acácio Domingos de Castro, hatete uza plataforma saudavel tuir perspetiva moral igreja nian, bainhira nia sai oradór ba iha Kampaña Nasionál Kombate HOAX ho tema “Sensibilizasaun Literasia Dijitál” da-lima ba Eskola Ensinu Sekundáriu Jerál, 4 Setembru, iha Salaun INFORDEPE, Balide.
Nia hatete, moral ne’e saida, moral ne’e mak hanesan prinsípiu ida atu uza ida ne’e ho opsaun rua, ida maka, hili buat ne’ebé di’ak, no buat ne’ebé la di’ak la presiza hili.
“Opsaun moral, tama iha ita-nia fuan katak, ha’u nu’udar fiar na’in atu hili ida ne’e, hanesan mós ema hotu hatene katak, meius komunikasaun teknólojia ne’e, fó buat barak liu ba ema moris”, nia hateten.
Nia dehan, ko’alia kona-ba kontestu uma kreda nian katak, nu’udar fiar na’in, bainhira ema uza laloos, entaun ida ne’e sei estraga, maibé uluk nanain la’ós estraga nia mak uluk, maibé estraga mundu, tanba kontribui buat ne’ebé la di’ak ba iha sosiedade hodi sai aat.
Nia subliña, hanesan mós Sekretariu Estadu Komunikasaun Sosiál, dehan nu’udar ema moris iha fatin ida hamutuk na’in-500, no hotu-hotu hakarak atu ko’alia liafuan ne’ebé di’ak, loron-loron kada ema ida ko’alia buat ne’ebé di’ak, no mós hotu-hotu like no fó komentáriu hotu, ne’e ninia impaktu boot, ida ne’e maka media abilidade, entaun aproveita ida ne’e hodi halo buat ne’e di’ak.
“Ita tenke iha atitude ka iha prinsípiu ida ne’e, hanesan ita ko’alia kona-ba pensamentu krítiku, nune’e ha’u tenke hatene katak, tanba saida mak sai nune’e, ho ida ne’e iha parte igreja dehan, atu ba ne’ebé tenke hatene lai katak, media sosiál ne’e atu halo saida,” nia esplika.
Ne’e duni media ne’e aplika ba ema hotu, ba iha ema ne’ebé rona, haree no mós hirak ne’ebé produz informasaun, husi sira mós tenke hatene atu produz informasaun sira ne’ebé di’ak. Husi ida ne’e hili desizaun sira ne’e tenke bazeia ba prinsípiu moral, tanba media iha influensia makaas liu.
“Entaun uma kreda dehan saida kona-ba media, sei ita iha vokasaun prinsipál haklaken ho verdade, ida mak vokasaun primeiru kona-ba media ou MedSos, ita liuhusi mensajen ne’ebé ita pasa informasaun liuhusi tipu oi-oin tenke ko’alia kona-ba lia loos,” nia dehan.
Ikus nia dehan, atu kombate HOAX ne’e, ida ne’e mak sai baze ba ema hotu atu halo ida ne’e, ne’ebé presiza promove unidade, hanesan ema hotu hatene katak, media ne’e nia vantajen mak saida, nia vantajen mak ema hotu bele halo inter ligadu.
1,879 total views, 12 views today
