DILI, (timorpost.com)— Eskola Téknika Informatika (ETI) iha Segunda, (29/01) gradua tan estudante hamutuk 253 no entrega hikas estudante ba inan-aman ho kondisaun ne’ebé di’ak hodi kontinua sira-nia estudu iha nível tuir mai.
Diretór interiñu ETI, Cancio Pereira, hatete graduasaun hanesan responsabilidade ida ba eskola ETI hodi rekoñese preparasaun rekursu umanu ne’ebé kualidade no iha momentu graduasaun ne’e espesiál ba graduadu sira.
“Ami apresia tebes ba rezultadu sira ne’ebé mak ita-boot sira hetan ohin loron, ba inan-aman sira graduadu nian, ha’u agradese ba inan-aman sira tamba sira-nia esforsu mak ohin loron sira (estudante-red) na’in-253, simu ona graduasaun no graduasaun ida-ne’e la’os ikus ona ba sira maibé ida-ne’e inísiu ba jornada estudu nian”, Diretór interiñu ETI, Cancio Pereira, hato’o liuhosi nia diskursu iha salaun IOB. Fomentu, Segunda, (29/01).
Tuir nia, graduasaun ne’e hahú husi pre-eskolár to’o ensiñu superiór, maske nune’e, graduasaun ne’e hanesan finál ba graduante sira nu’udar kandidatu iha kompetisaun no inan-aman nu’udar ekipa susesu ba oan, tamba kompetisaun ne’e moruk no midar ne’ebé graduadu sira sente durante tinan 3 nia-laran.
“Atu hatete de’it katak saida de’it mak ita-boot sira hasoru, nia rezultadu mak ohin loron ita-boot sira akaba estudu iha ETI, ba graduadu sira lakleur tan ita-boot sira sei sai alumni ETI Dili, sai nu’udar alumni reprezenta ETI iha komunidade nia leet, nafatin hahalok di’ak ne’e sai hanesan lalatak ETI Dili nian, no kuidadu nafatin ETI Dili nia naran iha ne’ebé de’it ita-boot sira inklina-an ba, sempre hanoin no halo buat di’ak ba”, Nia hato’o.
Iha oportunidade ne’e Diretór interiñu ETI ne’e mós agradese ba graduadu sira ne’ebé termina ona sira-nia estudu iha eskola ETI, tanba durante tempu naruk maske iha situasaun defísil nia-laran hasoru defikuldade no obstákulu oioin durante tinan naruk maibé graduadu sira konsege finaliza sira-nia estudu iha ETI.(*)
1,410 total views, 3 views today
Bele hare Video Seluk :