AILEU—Sentru Sidade Universitáriu Aileu ne’ebé lokalizasaun iha Munisípiu Aileu, Postu Aileu Villa, Suku Lau Usi no Suku Bandudato, Aldeia Railete, Bairo Mantane, komunidade uma kain 29 lakohi fó sira nia rai produtivu ba Governu atu harii Sentru Sidade Universitáriu Aileu.
“Ami komunidade husi Aileu Mantane kompostu husi Uma Kain 29, totál populasaun 131 ne’ebé rejeita Governu atu foti ami nia rai hectares 16,” deklara Portavós Egas Andre Alves Mesquita ho komunidade sira ne’ebé hala’o Konferénsia Imprensa iha Suku Bandudato, Aldeia Railete, Bairo Mantane, Sesta (17/02).
Nia haktuir, Rai ida ne’ebé mak daudauk ne’e sira (komunidade) hela ne’e la’ós rai estadu. Rai ida ne’e sira nia rai eransa ne’ebé mak Avó bei’ala sira fó husi jerasaun ba jerasaun.
To’o agora rai produtivu ida ne’e komunidade sira ne’ebé afeta ne’e sei uza hodi sobrevive sira nia moris nu’udar Agrikultór hodi kuda ai-han, atu sira bele han no fa’an iha merkadu hodi fó eskola ba oan sira.
“Maski nune’e Governu liu husi Ministériu Ensinu Superior obriga nafatin ami, mai ho forsa, ameasa no terror hasoru ami komunidade ne’ebé la iha kbiit atu hasoru sira,” nia dehan.
Enkuantu husi preokupasaun ne’e, Organizasaun Sosiedade Sivíl Rede ba Rai (RbR) rejista Uma Kain 59, Uma Kain 29 ho ema na’in-131 lakohi entrega sira nia rai 16 hectares.
Aleinde ne’e mós, tuir dadus husi MOP, MESSK, MJ no MAP hamutuk Uma Kain 44, ema 118 nu’udar agrikultura. Rai Parselas ka rai restu sukat ona 103. Rai hectares 248,250 m2 (24, 82 ha).
Osan kompensasaun ba rai dolar amerikanu 744.750.00, ba ai-horis 172.582.00, entaun osan hamutuk 1.375.987.05, uma Kain ne’ebé mak iha ai-horis hamutuk 59. (MJ4)
1,612 total views, 3 views today
Bele hare Video Seluk :
Subscribe to Timorpost
