Dili (timorpost.com) – Organizasaun Noun Governamentál (OGN) Foin Sa’e Unidade Dezenvolve Futuru (FUNDEF), Timor-Leste servisu hamutuk ho Yayasan Hivos, fornese formasaun gratuita atu tulun juventude na’in-50 ne’ebé identifikadu hanesan dezempregu, la remata nia nivel estudu, no ema ho defisiénsia.
“Total formandu na’in-50, kompostu husi feto na’in-25 no mane na’in-25, formasaun hirak ne’e tópiku Komputadór, Ilustrasaun, Jestaun Administrasaun no Finansas, ho objetivu atu haforsa juventude nia koñesimentu no abilidade iha area refere hodi prepara sira atu kompete iha Merkadu Traballu”, Diretór FUNDEF, Carlos Moniz Gonçalves, hateten iha Sentru Formasaun FUNDEF, Kampun Baru, Segunda (07/11).
Nia dehan, formasaun ida ne’e servisu hamutuk entre sentru formasaun FUNDEF ho Hivos, no mós partisipa no abertura husi parte Governu nian liuhusi INDIMO, liuliu ba iha formasaun administrasaun Finansas no komputadór, ida ne’e formasaun hodi hatene katak oinsá maka sira apoiu ba Juventude sira ne’ebé dezempregu no la kontinua sira-nia eskola.
Diretór ne’e dehan, bazeia ba asuntu hirak ne’e formandu sei partisipa másimu iha formasaun teoria no pratika durante fulan tolu (3), iha sentru formasaun FUNDEF.
Hafoin formasaun FUNDEF sei rekomenda formandu sira ba halo estájiu fulan tolu to’o neen ba instituisaun sira hanesan parte Governu nian, Ajénsia, NGO Internasionál, Lokál no mós kompañia sira.
Nia esplika, programa estájiu ne’e objetivu atu bele iha abilidade no komportamentu di’ak bele kontinua nafatin tanba ida ne’e parte ida reforsa sira-nia koñesimentu no abilidade oinsá maka joven sira mós iha skill ne’ebé di’ak hodi prepara sira-nia aan molok ba halo kompetisaun iha kampu Traballu.
“Formasaun ida ne’e ita hetan apoiu finanseiru husi OGN Hivos ne’ebé ita oferese gratuita ba joven sira ne’ebé identifika katak sira la kontinua Eskola no mós sira ne’e dezempregu”, nia hateten.
Ikus nia dehan, matéria bazeia fila fali ba tipu tolu ne’ebé hanesan ilustrasaun oinsá sira aprende kona-ba halo dezeñu no sira halo dezeñu hodi hatama ba iha internet.
2,661 total views, 3 views today
Bele hare Video Seluk :
Subscribe to Timorpost
