Dili(timorpost.com)—Diretór Jerál Sekretáriu Estadu Juventude no Desportu, David Tomas de Deus, dehan, tempu mak halo ema hamutuk no mós tempu mak halo fahe malu, Adeus Sekretáriu Estadu Juventude no Desportu (SEJD), Abrão Saldanha.
Deklarasaun ne’e nia dehan, hafoin halo serimónia despedida ikus ho Sekretáriu Estadu Juventude no Desportu (SEJD), Abrão Saldanha, hamutuk ho funsionáriu sira no parseiru sira hotu, durante nia mandatu oitavu governu.
Nia dehan, tanba mandatu Sekretáriu Estadu Juventude no Desportu nian, durante tinan rua ho balun, ohin hanesan mandatu ikus hamutuk ho funsionáriu no parseiru sira hotu ne’ebé mak durante ne’e servisu hamutuk di’ak tebes.
“Ami agradese, tanba ho ita boot nia servisu durante tempu badak tebes assume kargu hanesan Sekretáriu Estadu, maibé halo esforsu maka’as no konsege muda buat balun”, David Tomas de Deus, dehan iha serimónia Despedida, iha Golden Star, Audian, Sesta (30/06).
Nia subliña, tanba ne’e nia lori funsionáriu tomak iha (SEJD) nia naran hato’o agradese ua’in tebes, tanba durante tinan rua ho balun Sekretáriu Estadu nia prezensa halo mudansa lubuk ida.
“Tanba nia mandatu konsege halo aprovasaun lei balun, tantu hosi Desportu no Juventude nian no balun daudaun ne’e sei iha prosesu nia laran, tanba nia mai joven tebes, maibé brani sim responsabilidade boot nasaun nian no konsege realiza no servisu ho di’ak”, nia deklara.
Tuir nia, tanba problema boot Juventude nian iha rai laran tinan barak nia laran susar tebes, maibé hosi nia mandatu konsege rezolve balun no konsege loke kampu traballu ba Juventude sira.
Nune’e ohin mandatu iha ne’e remata ona, maibé hanesan joven espera iha futuru dezenvolvimentu Juventude no desportu sei presiza nafatin, entaun susesu nafatin iha karreira polítika tomak.
“Hanesa ita boot nia liafuan sempre dehan, husik hela legadu di’ak no hakat ba horizonte foun espetativa boot, nune’e ami fiar ita boot sei susesu nafatin iha karreira, tanba juventude sei presiza ita boot sira”, nia hakotu.
1,234 total views, 3 views today
Bele hare Video Seluk :